Ажнай Д.Бат-Эрдэнийн луйвар 3
2012-03-31 10:10
Дэлхий нийтийн харааг Өмнийн говь руу татах болсон Таван толгойн ордуудын тухай цуврал нийтлэл хүргэж байгаа билээ. Таван толгойн ордуудыг Баруун ба Зүүн цанхи гэж хувааж, үүнд “Эрдэнэс МГЛ”, “Энержи ресурс”, “Дайцүки”, “Таван толгой” зэрэг компаниуд үйл ажиллагаагаа явуулж байгаа.

Эдгээрээс далд хэрнээ хамгийн их хуудуутай үйл ажиллагаа явуулж байгаа нь бага Таван толгойн ордыг эзэмшиж буй “Таван толгой” ХК гэдгийг өмнөх нийтлэлүүдээрээ бид баримттайгаар дэлгэсэн. Дэлхийн зах зээлээс маш бага үнээр нүүрсээ зардаг, 80 тэрбум гаруй төгрөгийг татвараас нуусан, тусгай зөвшөөрөлгүй компаниудаар дамжуулан экспортолдог гээд цөөнгүй зөрчил байгаа юм. Өмнөговийн иргэдийн мэдэлд өгсөн 51 хувийг засаг даргын орон тооны бус зөвлөх, “Ажнай” корпорацийн эзэн Д.Бат-Эрдэнэ болон нутгийн хэдэн баячууд 2008 оноос хойш хувьдаа завшиж байгаа нь Татварын ерөнхий газрын шалгалтаар ил болсон тул Засгийн газар орон нутгийн 51 хувийг эргүүлэн авахаар зүтгэжээ.

Эрдэс баялаг, эрчим хүчний яам 2009 оны 4-р сард “Таван толгой” ХК-ий үйл ажиллагаанд хийсэн шалгалтын дүгнэлтэндээ:
-“Таван толгой” ХХК нь олон улсын хэмжээнд ашиглахаа больсон, алдагдал ихтэй авто тээврээр нүүрс тээвэрлэж, говийн дархан цаазтай газрын хөрсийг эвдэж, нүүрс овоолон байгаль орчныг бохирдуулж байна.
-Гүйцэтгэх удирдлага болон ТУЗ-ийн бүрэлдэхүүнд уул уурхайн чиглэлийн мэргэжлийн хүн байхгүйгээс техник технологийн горим, мэргэжлийн удирдлага алдагдаж байна.
-Уурхайн ажлыг технологийн дагуу явуулах, хөрс хуулалт, нүүрс олборлолт, тээвэрлэлт, экспортлох, ажлын байр нэмэгдүүлэх, компаний эрх ашгийн төлөө зөв менежмент хийх зэрэг олон асуудлыг Өмнөговь аймгийн удирдлага болон “Таван толгой” ХК шаардлагатай хэмжээнд зохион байгуулж чадахгүй байна гэжээ.

Дээрх дүгнэлт болон бусад баримтуудыг үндэслэн 2009 оны 9-р сард тухайн үед Засгийн газрын хэрэг эрхлэх газрын дарга байсан Б.Долгор Эрдэс баялаг, эрчим хүчний сайд Д.Зоригтод албан бичиг хүргүүлж, Засгийн газрын хэмжээнд хэлэлцүүлэх үүрэг өгчээ. Энэ дагуу Д.Зоригт сайд шалгалтын дүнтэй танилцаж “Таван толгой” ХК-ний орон нутгийн өмчлөлд буй 51 хувийг төрийн өмчид буцаан авах саналыг нь дэмжсэн байна. Мөн Төрийн өмчийн хорооны дарга байсан Д.Сугар ч дэмжсэн саналаа ЗГХЭГ-т албан бичгээр хүргүүлсэн аж.



Гэсэн ч бага Таван толгойн олонхи буюу орон нутгийн өмчлөлд байгаа 51 хувийг Өмнөговийн удирдлагууд болон цөөн хэдэн хүн захиран зарцуулах эрхтэй тул яаж зарцуулах нь орон нутгийн эрх мэдлийн асуудал гэсэн шалтгаан Засгийн газрын хөлийг тушиж байжээ.

Орон нутгийн эзэмшдэг 51 хувийг Д.Бат-Эрдэнэ /“Таван толгой транс” , “Ажнай” ХХК-ий эзэн/, С.Сумъяа /аймгийн ИТХ-ын төлөөлөгч/, А.Идэрцог /аймгийн ИТХ-ын тэргүүлэгч, тус аймаг дахь “Хаан банк”-ны захирал/, Г.Цог-Өрнөх /Цогтцэций сумын засаг дарга/, А.Жаргалсайхан /аймгийн ИТХ-ын тэргүүлэгч/ нарын таван хүн төлөөлдөг. Харин бусад 49 хувийн ногдол ашгийг хуваарилахдаа 258059 ширхэг хувьцаанаас Д.Бат-Эрдэнэ 17445 буюу 6.76, С.Өлзийхишиг 3830 буюу 1.48 Д.Мөнхсайхан 55555 ширхэг буюу 21.53, “Ажнай корпораци” 3757 ширхэг буюу ,1.46, “Ээрмэл” 20235 ширхэг буюу 7.84, “Шандас Импекс” 85894 ширхэг буюу 33.28, бусад 282 нь 71343 шихэг буюу 27.65 хувийг эзэмших болжээ.

Тиймээс эдгээр хүмүүсийн эрх мэдлээс “Таван толгой” ХХК-г салгаж авахын тулд Эрдэс баялаг, эрчим хүчний яамнаас Төрийн болон орон нутгийн тухай хуульд нэмэлт, өөрчлөлт оруулах тухай хуулийн төсөл санаачилсан байна. Мөн ЗГ-ын тогтоолын төслийг ч бэлджээ.





Өмнөговьчуудад “наалдахгүй”, хэдхэн хүний гарын тоглоом болоод байгаа бага Таван толгойг эргүүлэн авахын тулд Засгийн газар ч тэр, салбарын яам нь ч тэр хүчин чармайлт гаргажээ. Гэтэл энэ асуудлийг өнөөдрийг хүртэл УИХ-ын чуулганаар хэлэлцсэнгүй, Төрийн болон орон нутгийн тухай хуульд нэмэлт, өөрчлөлт орсонгүй. Харин ч “Таван толгой” ХХК-ний ТУЗ-ын гишүүдийн эрх мэдэл улам бүр бэхжсээр байна. Бага Таван толгойд чухам юу болоод байгааг Засгийн газрын сайд нар, УИХ-ын гишүүд бүгд мэдэж байгаа ч нэг нь ч ам ангайхыг хүсэхгүй байгаа юм. Бүхэл бүтэн төрийн институтыг сайдтай нь, гишүүдтэй нь дуугүй байлгаж чаддаг гэхээр цаана нь ямар их мөнгө, эрх ашиг байгаа нь харагдаж байх шиг. Ямартаа ч Засгийн газар эхлүүлсэн ажлаа дуусгах цаг болсныг өмнөговьчуудын улам доройтсоор байгаа амьдрал харуулсаар байгаа. Бага Таван толгойг төрийн мэдэлд эргүүлэн авах зайлшгүй шаардлага байгааг нотолсон манай нийтлэл үргэлжлэх болно.
Эх сурвалж: chuhal.mn


 




Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • unen iim l baigaa shde 5tolgoig tor medeldee avah tsag udahgui baih o
    2012 оны 04 сарын 02 | Хариулах
  • Сонгуулийн өмнөх сурталчилгаа
    2012 оны 03 сарын 31 | Хариулах
  • худлаа атаархах юм даа гэж
    2012 оны 03 сарын 31 | Хариулах
  • Их уншсан
  • Их сэтгэгдэлтэй