Wikimon: Нийслэлийн 7-р хороолол хаачив? (Цуврал 2)
2012-09-11 11:05
Нийслэлд нэгээр нэмэгдэн сүндэрлэсэн байх учиртай 7-р хороолол хотын хуучин амбан захирагч асан Г.Мөнхбаяр хийгээд түүний Барилга, хот байгуулалт хариуцсан орлогч, хуучнаар Баянзүрх дүүргийн Засаг дарга асан Б.Мөнхбаатар нарын гол ажил байсан ч цаасан дээр хэрэгжиж, ажлаа өгөхөд нь нэг ч тоосгоор ажил нь ахиагүй байсаар хотын шинэ удирдлагуудтай золголоо. Уул нь Нийслэлийн экс удирдлагуудын яриад байсан 7-р хороолол гэгч нь ажлаа эхэлчих юм бол хотын утааг 30 хувиар бууруулж, гэр хорооллыг багасган шинээр 5000 орчим өрх айл орон сууцанд нүүж орох боломж нөхцөл бүрдэх юм.

Мөн үүнээс гадна хотын төвийн А зэрэглэлийн бүс гэж нэрлэгдээд байгаа хэрнээ гэр хороолол, дугуй засварын газар, барилгын материалын захаар дүүрчихсэн хэсэг газар ч гэсэн хөгжлийн өнгийг илтгэх нь дамжиггүй юм. Улсын төсвөөс 100 орчим тэрбум төгрөг зарцуулан төлөвлөгөө боловсруулж, зураг төсөл гаргасан 7-р хороолол үлгэр байв уу? Мөн хотын захирагч Г.Мөнхбаяр хийгээд түүний шадар Б.Мөнхбаатар нарын мөнгө унагаж, төсвийн хөрөнгөнөөс шамшигдуулах, жил, сар өнгөрөөх тусам авах мөнгө нь нэмэгдэх бизнес байв уу гэдэг асуултын дунд олон хүмүүс төөрч байна. Арга ч үгүй биз. 2012 он гэхэд сүндэрлэж эхэлсэн байх учиртай 7-р хороолол нь он дуусч байхад эхлээгүй байгаа юм.

Өчигдөр манай сайт зах зээлийн ханшаас хэд дахин доогуур үнэлгээнээс болж иргэд газраа чөлөөлөхгүй байгаа талаар хүргэсэн бол өнөөдөр 7-р хорооллын гол цөмийг бүрдүүлэх 100 айл орчмын барилгын материалын захын тухай цухас дурдъя.

 - Хятад хорооллыг яагаад нүүлгэхгүй байна вэ? -
100 айл орчим буюу ирээдүйн 7-р хороолол, одоогийн Сүхбаатар дүүргийн нутаг 10,11,12-р хорооны орчмыг өдгөө Монголын “China town” гэж нэрийддэг болжээ. Нийслэл бий болж байхад л энэ хавьд анхнаасаа хятадууд амьдардаг байсан, үр хүүхдээ эндээ төрүүлж өсгөн, үе удмаараа Монголоос мөнгө халаасалсан болохоор ингэж нэрийддэг байх. Өдгөө 100 айл орчимд иргэд үнэндээ орон сууц худалдаж авахаасаа ч айдаг болжээ. Учир нь, 2010 онд л гэхэд “Баясах трэйд” \Багро нэрийн салат, огурцыгээр нь иргэд сайн мэднэ\ ХХК 100 айлын барилгын материалын захуудын дунд 12 давхар орон сууцны барилга ашиглалтад оруулсан ч байрны 80 орчим хувийг нь хятад иргэд худалдаж авсан учир энэ мэдээллийг сонссон монголчууд тус байранд амьдрахаас жийрхэн захиалга өгөхөөс татгалзжээ. Ер нь 100 айл орчим ч биш 11-р хорооллын байрнууд ч гэсэн ихэнх нь хятад эзэдтэй аж. Юу хэлэх гээд байна вэ гэвэл 100 айлын барилгын материалын захын павильон, барилгууд тэр чигтээ хятадуудынх гэсэн үг.

Үнэн чанартаа бол 2011 оны 7-р сараас эхлэн 100 айлын барилгын материалын захыг нүүлгэн шилжүүлэх шийдвэр гарсан. Тэгээд ч манайх шиг хотынхоо төвд хамгийн зэрэглэл өндөртэй газартаа барилгын материалын бөөний цэг байгуулчихсан өөр нийслэл хаана ч үгүй. Зуны улиралд идэвхтэй байдаг ч айл бүхэн байраа засч, ханаа обойдхоор Зуун айлыг зориод байхгүй тул барилгын материалын зах гэдэг зүйл арьс ширний ченжүүдийн нэгэн адилаар хотоос зайдуу байлаа гээд муудах зүйл огт үгүй. Гэтэл шийдвэр гарснаас хойш хэрэгжихгүй нэг жилийн нүүрийг үзэж байна. Иргэдийн арай ядан барьсан гаражийг машин авчраад албадан буулгаж, нүүлгэж, зардлыг нь эздээс нь гаргуулж чаддаг хэрнээ хятад эзэдтэй барилгын материалын дэлгүүрүүдийг нүүлгэж чадахгүй шийрэгнээд байгааг нь харвал хотын экс удирдлагууд хятадууддаа хэрхэн өөрсдийгөө мэдүүлчихсэн нь харагдаж байгаа хэрэг биш үү?

Мөн энэ хорооллыг нүүлгэн шилжүүлэхийн тулд улсын төсвөөс 600 тэрбумыг саах хэрэг гарах юм гэсэн. Үнэндээ хуулиа хэрэгжүүлж чаддаг, хяналт тавьж чаддаг удирдлагатай бол албадан нүүлгэх хамгийн оновчтой аргыг хэрэгжүүлж болмоор харагдаад байгаа. Энэ ажил мэдээж одоогийн хотын захирагч Э.Бат-Үүлийн мөрийн хөтөлбөрийн гол зүйлүүдийн нэг болон үлдэж байгаа юм. Үүнээс гадна замын түгжрэл, утаа, тоосжилт, үерийн аюултай бүс гээд яриад байвал Зуун айлд асуудал олон. Мөн гэр хорооллын гудамжнууд нь хогийн цэг, муу усны нүх, жорлон болж хувирчээ. Дээрээс нь барилгын материалын элдэв хог, цемент хийснэ. Иргэдийн хөл хөдөлгөөн ихтэй УБЕГ, Арьсны өвчин  судлалын үндэсний төв, Сүхбаатар дүүргийн нэгдсэн эмнэлэг, бидний хэлж заншсанаар Хүүхдийн хоёрдугаар эмнэлэг энд байрладаг. Хотын захирагчийн ажлын албанаас томоохон худалдаа үйлчилгээний төв, захуудын цагийн хуваарийг өөрчиллөө. Энэ нь замын түгжрэлийг сааруулах зорилготой. Гэтэл Зуун айл орчмын зам ямар ч үед түгжрэлтэй хэвээр. Ялангуяа дулааны улирал эхэлж, барилгын ажил ид өрнөхтэй зэрэгцэн замын түгжрэл бүр ч дийлдэхээ больдог.

Хотын төвийн дүүрэгт барилгын материалын худалдаа эрхэлж байгаа иргэд хэдийгээр нүүлгэх шийдвэрийг эсэргүүцэж, эрх ашгаа дээгүүр тавьж байгаа ч тэр хавийн оршин суугчид барилгын цемент, шохойд хордсоор байна. Тиймээс л эндхийн барилгын материалын дэлгүүрүүдийг хотын зах руу нүүлгэх нь нэн чухал хийгээд хэд гурван цаасны ашгаас илүүтэйгээр тэнд амьдарч, ажиллаж байгаа иргэд, өсч томорч байгаа хүүхдүүдийн эрүүл мэнд хохирч, ирээдүйд мөнгөөр худалдаж авах боломжгүй тийм нөхцөл байдал үүсэхгүй байх баталгаагүй юм. Сүүлийн гурван жил гаруй яригдаж байгаа  тус барилгын материалын дэлгүүрүүдийг нүүлгэх тухай шийдвэр нь өнгөрөгч онд гарсан ч шийдвэр гаргагчдын хэлсэн хугацаа аль хэдийнэ өнгөрлөө. Ийнхүү иргэдийн сэтгэл зүйг далимдуулан баярлуулж, догдлуулсан 7-р хороолол ор сураггүй байсаар байна. Хотын экс удирдлагуудын хариуцлагагүй ажлыг эргэн нэг харж, гаргасан хэрнээ хэрэгжээгүй шийдвэрүүдийг эргэн харах цаг нь болжээ. Мөн албан тушаалаа өгсөн л бол сүүлээ хавчаад хаа нэгтээ гадаадын орноор амарч зугаалдаг биш, хийгээгүй ажлынхаа төлөө хариуцлага хүлээдэг байгаасай.
Г.Тэгш (www.wikimon.mn)

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Чимгээ
    барилгын материалын үнийг арай багасгах ба чанартай баймаар байна.
    2015 оны 05 сарын 19 | Хариулах