Гурван жилийн хугацаанд шинэчлээгүй байж, одоо шинэчилнэ хэмээн ”том дуугарсан” Д.Дорлигжав суудлаа өгөх үү?
2012-11-29
- Түүнд таалагдах прокурор байдаггүй болохоор ийнхүү шинэчлэхээр шийдсэн бололтой -

Прокурорын төв болон орон нутгийн байгууллагын удирдах ажилтны нэгдсэн зөвлөгөөн уржигдар УЕП-ын газарт эхэлжээ. Зөвлөгөөнд аймаг, нийслэл, тээвэр, сум дундын мөн дүүргүүдийн ахлах болон орлогч прокурорууд нийлсэн 100 гаруй прокурор оролцож байна. Удирдах ажилтнууд зөвлөгөөнөөр прокурорын байгууллага өнгөрсөн хугацаанд хийж гүйцэтгэсэн ажил, ажлын ололт, оршиж байгаа дутагдал, тэдгээрийг арилгах арга, цаашдын зорилтын талаар харилцан ярилцаж, мэдээлэл солилцож байгаа аж.  Уг зөвлөгөөн энэ сарын 30-ныг хүртэл үргэлжлэх бөгөөд сүүлийн өдөр нийслэлийн болон орон нутгийн прокуроруудад Ерөнхий прокурор Д.Дорлигжав үүрэг, даалгавар өгөх юм байна. Уг зөвлөгөөн их ширүүн эхэлсэн юм байна.
 
Хэдхэн хоногийн өмнө ерөнхий прокурор Д.Дорлигжав сэтгүүлчидтэй зангиагүй уулзалт хийж, байгууллагынхаа жаргал зовлон, алдаа оноо, хариуцлага энэ тэрийг ярьж сэтгэлээ уудалсан юм. Үнэнийг хэлэхэд  Х.Тэмүүжинийг Хууль зүйн сайд болсноос хойш хуулийнхан бүгдээрээ хөдлөж эхэлсэн нь үнэн. Гэтэл яагаад прокурорын байгууллагын толгойлогч, дээр нь суусан хүний хувьд өнөөдөр шинэчилж чадаагүй юм бэ? Тэгсэн хэрнээ “Монголд надад таалагдах прокурор алга. Прокурорын чадвар, мэдлэг хомс дутмаг байна. Жишээлбэл, нэг хэргийн эсэргүүцэл бичээд ирлээ гэхэд бичгийн хэлбэр, үсгийг нь гаргадаггүй. Бараг монголоос монгол руу орчуулж байж ойлгодог” хэмээн мэргэжил нэгт нөхдөө сэтгүүлчдэд муулж өөрийгөө магтсан гэнэ. Тэрбээр “Намайг Ерөнхийлөгч Ц.Элбэгдорж Улсын ерөнхий прокуророор томилсон. Гэхдээ надад их эргэлзэж байх шиг байсан. Би бол мэргэжлийн хуульч, өнөөдөр хуулийн болон прокурорын байгууллагыг ямар шатанд авч явааг эрхбиш харж байгаа байлгүй” гээд томорч, тодорч өгчээ.

Гэтэл энэ эрхэм суудлаасаа залхсан уу эсвэл прокуроруудтайгаа ажиллахаас төвөгшөөсөн үү шал өөр албан тушаалд горилж, нэрээ дэвшүүлсэн нь өнгөрсөн баасан гарагт хэвлэлийнхний эхний нүүрт мэдээ нь гарч шуугиан тарьсан. Монголын үндэсний олимпийн хорооны ерөнхийлөгчийн ээлжит сонгууль энэ жил болох юм. Сонгуульд өрсөлдөх хүсэлтэй хүмүүсийн бүртгэл явагдаад дууссан сурагтай. Энэ сарын 19-нийг хүртэл бүртгүүлсэн хүмүүс л сонгуульт ажилд өрсөлдөх боломжтой аж. Энэ удаа Олимпийн хорооны ерөнхийлөгчийн төлөө өрсөлдөхөөр гурван хүн бий. Тэрний нэг нь Д.Дорлигжав. Нөгөө хоёр нь тус холбооны одооны ерөнхийлөгч Д.Загдсүрэн, “Голомт” банкны ТУЗ-ийн дарга асан Д.Баясгалан нараас гадна бас нэг эрхэм байгаа аж. МҮОХ-ны ерөнхийлөгчийг олимпийн чуулганы төлөөлөгчдөөс нэр дэвшүүлж нууцаар санал хураан дөрвөн жилийн хугацаагаар сонгодог гэнэ.

Мэргэжлийн хуульч хүн биеийн тамир болоод спортынхныг удирдаад явах ухаан, ажлын дадлага туршлага түүнд бий гэдэгт итгэх хүн байдаг л байх.  Хэн нэгэн эрх мэдэлтэй эрхэм ямар ч төрийн байгууллагыг толгойлоод аваад явчих “шаанс”, эрх нь байдаг гэдгийг Д.Дорлигжав харуулах гээд байна уу даа гэсэн “хардлага” төрөхөөс цаашгүй.  
Зөвлөгөөний үеэр Д.Дорлигжав төв, орон нутгийн нийлсэн 100 гаруй прокурор, удирдах зөвлөлийн гишүүдэд хатуухан өнгө аястайгаар “Шинэчлэгдэж чадахгүй, чадвараа дээшлүүлж, хуулийн ажлыг сайн хийж чадахгүй хүн байвал бараг сайн дураараа суудлаа тавьж өгч зайлаарай” хэмээн хатуухан үг хэлсэн ч нөгөө талаар прокуроруудын харшлыг хөдөлгөсөн байна.

Түүний удирдлага дор ажилладаг прокурорууд нь “Өнгөрсөн гурван жилийн хугацаанд олигтойхон дуугараагүй байж одоо оодорч шинэ сайд Х.Тэмүүжинг үзээд шилээ шилгээв гэгчээр биднийг хажиглаж, хөөгөөд байх даа яах вэ дээ. Чадлынхаа хүрээнд ажиллаж байна. Тийм айхтар байсан юм бол өнгөрсөн гурван жилийн хугацаанд олигтойхон ажил хийснийг нь мэдэхгүй л юм” гэж хээв нэг ярих прокурор ч байхад “Манай ерөнхий сайн ажиллаж байгаа. Нийгэмд шинэчлэгдээгүй байгууллага хуулийнхан байсан. Харин 2010 оноос эхлэн шинэчлэх талаар ярьж өдий хүрсэн ч үүнийгээ одоо хэрэгжүүлэх гэж байгаа Д.Дорлигжавт талархаж байна” гэж доль цохих нэгэн ч байсныг үгүйсгэхгүй юм.

Манай прокуроруудын бас нэг алдаа ч гэх юм уу юманд том хандах хандлага байдаг. Ядарсан нэгэнд ял оноогоод, задарсан нэгнийнх нь ялыг өршөөж, толгойг нь илээд явуулдагаа үгүйсгэдэггүй прокурор ч манайд байна. Тэрбээр том эрх мэдэлтэй хүн, нэр ус, албан тушаалыг нь хэлээд ч яах юм. “Бидний эрх юм чинь яах нь бидний дур. Хуулиндаа прокурорын шатанд хэргийг хэрэгсэхгүй болгодог эрх заалт нь байхад яадаг юм бэ? Бидний эрх” хэмээн таахалзах хүн ч бий. Хичнээн прокурорын буруу, алдаанаас болж хилс хэргээр, хийгээгүй, үйлдээгүй хэргийнхээ төлөө өнөөдөр шүүхийн хаалга татаж, дээлээ нөмөрсөн иргэд байгаа гэдгийг хэн ч тааж мэдэхгүй юм даа.  Угаасаа урд нь ийм л байдал байсан. Шударга байсан прокурор,шүүх байхгүй, шинэчлэл хийнэ гэдэг амар асуудал биш, цаг хугацаа л харуулна. Мөнгөтэй, эрх мэдэлтэй хүний талд үйлчилдэг гэдгийг хүлээн зөвшөөрдөг прокурор байхыг үгүйсгэхгүй. Олны үг ортой гэгчээр прокурорын байгууллага аль тал руугаа шинэчлэгдэхийг цаг хугацаа харуулах биз ээ.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.
  • Их уншсан
  • Их сэтгэгдэлтэй