74 насандаа ихэр хүүхэд төрүүлжээ
2019-09-07 10:02
Энэтхэгийн Андхра-Прадеш мужийн оршин суугч 74 настай эмэгтэй үр шилжүүлэн суулгалтаар жирэмслэн ихэр хүүхдийн ээж болжээ.

30 жилийн тэртээ цэвэршсэн Эрраматти Мангаямма (Erramatti Mangayamma) 2018 оны арваннэгдүгээр сард орон нутгийн үр шилжүүлэн суулгах төвд хүүхэдтэй болох хүсэлтээ уламжилсан байна. Тус төв зардлын ихэнхийг өөрсдөө гарган өндөр настанд донорын өндгөн эс болон эр эсээр үр суулгасан нь амжилттай болжээ.

Нэгдүгээр сард эмнэлэгт хэвтэн жирэмсэний хугацаандаа эмч нарын байнгын хяналтад байсан Мангаямма есдүгээр сарын 5-нд кесарево хагалгаагаар ихэр охидын эх болсон байна.

“Хагалгаа амжилттай болсон. Эх, хүүхдүүдийн бие сайн байгаа. Ямар нэгэн хүндрэл тохиолдоогүй” гэж тус төвийн захирал Санакаяла Умашанкар (Sanakayyala Umashankar) сэтгүүлчдэд мэдэгджээ.

Ихрүүдийг донорын сүүгээр хооллож байгаа гэнэ.

Хатагтай Эрраматти Мангаямма төрсний гэрчилгээ болон иргэний үнэмлэхээрээ төрсөн он, сараа батласны дараа түүнийг хамгийн өндөр настайдаа хүүхэд төрүүлсэн эмэгтэйгээр албан ёсоор тодруулна. Өмнөх амжилтыг 66 насандаа ихэр хүүхэд төрүүлсэн испани бүсгүй Мария дель Кармен Бусада де Лара (Maria del Carmen Bousada de Lara) эзэмшдэг аж.

“Сэтгэл хөдлөөд хэлэх ч үг олдохгүй байна. 60 жилийн турш жирэмслэх, эх болох гэж аргаа барсаны эцэст бүх юм сайн сайхнаар төгсөж байна. Одоо хэн ч намайг “сувай” эм гэж хэлэхгүй боллоо” хэмээн аз жаргалаар бялхсан “залуу” эх ярьжээ.


Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй