Караокед гарсан галд өртсөн хүмүүс ГССҮТ-д эмчлүүлж байна
2019-10-14 12:06
Сүхбаатар аймгийн Баруун-Урт сумын 3-р багийн нутаг дэвсгэрт байрлах "Эрдэнэ Шарга" караокед аравдугаар сарын 11-ний 23.00 цагийн үед гал гарч, 20 гаруй хүн их бага хэмжээгээр түлэгдсэн, угаартсан байдалтай эмнэлэгт хүргэгджээ.

Галын улмаас нэг хүн нас барж, долоон хүний биеийн байдал муу байгаа учир аравдугаар сарын 12-нд нисдэг тэргээр Улаанбаатар хот руу тээвэрлэжээ. Мөн долоон хүнийг машинаар хот руу авчирсан байна. Үлдсэн таван хүн аймгийн нэгдсэн эмнэлэгт эмчлүүлж байгаа гэнэ.

ГССҮТ-өөс өвчтөнүүдийн биеийн байдлын талаар лавлахад “Биеийн байдал нь тогтворжихоор мэдээлэл өгнө. Одоохондоо мэдээлэл өгөх боломжгүй” гэсэн хариуг өглөө.

Гал түймэрт өртөж угаартсан, түлэгдсэн иргэдэд эмнэлгийн яаралтай тусламж үзүүлэх зорилгоор Зэвсэгт хүчний МИ-171Е загварын нисдэг тэргээр бямба гарагийн өглөө Сүхбаатар аймгийн Баруун-Урт сум руу эмч нар ниссэн юм. 

Одоогоор галын нөхцөл шалтгааныг тогтоохоор холбогдох байгууллагууд ажиллаж байгаа бөгөөд урьдчилсан байдлаар цахилгаан монтажны гэмтэл байж болзошгүй гэж үзжээ.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна