Гудамжинд ”морь харсан” цагдаагийн албан хаагчийг ажлаас нь халжээ
2019-10-17 15:15
Цагдаагийн ерөнхий газраас өнөөдөр /2019.10.17/ цаг үеийн асуудлаар мэдээлэл өглөө.


ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүү "2019 оны аравдугаар сарын 16-ны өдрийн 18 цагийн үед цагдаагийн албан хаагч олон нийтийн газар бие зассан бичлэг олон нийтийн сүлжээнд тавигдсан. Тэр даруйд ЦЕГ-ын аюулгүй байдлын хэлтсээс асуудлыг шалгаж тогтоосон.

Цагдаагийн ахлагч н.Сүхбаатар ажлын бус цагаар согтууруулах ундааны зүйл хэрэглэсэн үедээ Хан-Уул дүүргийн нутаг дэвсгэрт олон нийтийн газар бие засаж, цагдаагийн албан хаагчийн ёс зүйн дүрэм болон Монгол Улсын Зөрчлийн тухай хуулийг зөрчсөн. Цагдаагийн албан хаагчийн нэр хүндэд харшилсан ийм үйлдэл гаргасанд харамсаж байна. Энэ ёс зүйгүй үйлдэлд албан ёсоор иргэдээс уучлал хүсэж байна.

Уг асуудалд шалгалт явуулсны дүнд алба хаагчийг ажлаас нь чөлөөлсөн. Олон нийтийн газар бие зассан асуудалд Монгол Улсын Зөрчлийн тухай хуулиар торгуулийн арга хэмжээ авч байна. Цагдаагийн төв байгууллагаас алба хаагчийн сахилга, ёс зүйг дээшлүүлэх чиглэлээр “Зөв хэвшил” аяныг зохион байгуулж байна. Үүнээс гадна энэ чиглэлээр олон талт арга хэмжээнүүдийг авч хэрэгжүүлж байгаа” хэмээлээ.

Дараагаар нь ЦЕГ-аас 6000 байлдааны сум хураан авсан гэх хэргийн талаар мэдээлэл өглөө. 

Тэрээр "Эрүүгийн цагдаагийн албанаас өчигдөр хууль бусаар галт зэвсэг, сум худалдан борлуудаг 28-60 насны гурван иргэнийг байлдааны зориулалттай 9 төрлийн 6,605 ширхэг галт зэвсгийн сумыг худалдахаар бэлтгэн авч явсныг илрүүлсэн. Баянзүрх дүүргийн цагдаагийн газар Монгол Улсын Эрүүгийн хуулийн 20-ийн 4-р зүйлд заасны дагуу хэрэг нээж, мөрдөн шалгах ажиллагаа явуулж байна" гэлээ.

Мөн "Монголын Худалдаа аж үйлдвэрийн танхимаас цагдаагийн байгууллагад хүсэлт ирүүлсэн. Тухайлбал, сүүлийн үед эх орон байгаль орчноо хамгаалах нэрийн дор төрийн бус байгууллага бүлэг, холбоо иргэний зүгээс бизнесийн тодорхой салбарууд, уул уурхайн чиглэлээр үйл ажиллагаа явуулдаг гадаад дотоодын компаниудад дарамт шахалт үзүүлж айлган сүрдүүлж, нэр хүнд бие махбодид нь халдах үйлдэл удаа дараа гарч Монгол Улсын хуулийг зөрчиж байна. Энэ мэт үйлдлийг цаг алдалгүй шалгаж хуулийн дагуу хариуцлага тооцож өгнө үү гэсэн албан бичиг ирсэн.

Цагдаагийн байгууллага мэдээлэл авсан даруйд шалгалтын ажиллагаа хийдэг. Сүүлийн үед яллагдагчаар татагдсан этгээдүүдийн зүгээс нийгмийн сүлжээнд янз бүрийн үйлдэл хийж байна. Цагдаагаас дарамталж хууль бусаар хорьж байгаа гэдэг мэдээллийг олон нийтэд өгч байна. Дэлхийн Монгол ногоон нэгдэл төрийн бус байгууллагын тэргүүн Х.Бээжин бусдын эд хөрөнгийг авахаар заналхийлэх гэмт хэрэг үйлдэж амьдралын эх үүсвэрээ болгосон зүйл заалтаар хэрэг үүсгэсэн. Энэ хэрэг шалгагдаж байна. “Босоо хөх Монгол” ТББ-ын тэргүүн Г.Ганхуягт ялгаварлан гадуурхах, бусдын эд хөрөнгийг авахаар заналхийлэх зүйл ангиар хэрэг үүсгэсэн" гэв.

Хамгийн сүүлд "Цахим сүлжээнд хүүхэд хулгайлсан мэдээлэл тавигдсан. Баянхошуунд олон хүүхдийг хулгайллаа гэсэн мэдээлэл гарсан. Энэ мэдээлэл нотлогдоогүй байна. Гомдол мэдээлэл ирээгүй байна. Иргэд олон нийтийн сүлжээнд тавихдаа тухайн мэдээллийг үнэн бодитой эсэхийг нягталж байх хэрэгтэй. Бодитой мэдээлэл тавивал бидний ажилд дэмжлэг болдог. Гэмт хэргийн дуудлага мэдээллийг эхлээд цагдаагийн байгууллагад мэдэгдэхийг байхыг хүсч байна" гэлээ.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна