О.Баасанхүү өмгөөлөгчдийг өмөөрөв
2019-10-18 12:15
УИХ-ын чуулганы өнөөдрийн хуралдаанаар Өмгөөллийн тухай хуулийн төсөл болон хамт өргөн мэдүүлсэн хуулийн төслүүдийн эцсийн хэлэлцүүлгийг хийж байна.

Өмгөөллийн тухай хуулийн төсөл болон хамт өргөн мэдүүлсэн хуулийн төслүүд, Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон Хуульчийн эрх зүйн байдлын тухай хуулийн зарим бүлэг хүчингүй болсонд тооцох тухай хуулийн төслийг баталлаа.

Хуульзүйн байнгын хорооноос дээрх хуулийн төслийг анхны хэлэлцүүлгээр нь батлах санал гаргасныг чуулганы хуралдааны  үеэр гишүүдийн олонх дэмжсэн юм.

Уг хуулийн төсөлтэй холбогдуулан гишүүд асуулт асууж, үг хэлсэн юм.

УИХ-ын гишүүн О.Баасанхүү:
"Өмгөөлөгч, өмөөрөгч хоёр ялгаатай гэдгийг би зарим гишүүнд хэлмээр байна. Өмгөөлөгч гэдэг бол мэргэжлийн, хуулийн ажил хийж, хүний өмнөөс ажилладаг хүмүүс. Өмөөрөгч бол ээж, аав, ах дүү, хамаатан садангын асуудлаа яриад явдаг хүмүүс. Өмгөөлөгч бол прокурорын нэг тал нь. 

Прокурорыг нарийн яривал төрийн өмгөөлөгч, нөгөө нь иргэний өмгөөлөгч. Байцаан шийтгэх хуульд төр нь иргэнийхээ толгой дээр гарчихсан, төрийн өмгөөлөгчийг иргэн нь даган биелүүлдэг, үгнээс нь гардаггүй, үгнээс нь гарвал өөрөө хэрэгтэн болчих гээд байдаг. Үүнийг зассан зарчмын өөрчлөлт байна уу. Прокурор гэдэг нөхөр өнөөдөр том толгойтой юм бүхнийг прокурорын зөвшөөрөлтэйгөөр хийдэг болсон. Ард түмний дунд өмгөөлөгч авах хэрэггүй, прокурор, шүүгчтэй нь тохирчих гэдэг үг хүртэл гарсан. Үүнийг мөн засаж чадсан уу. 

Өмгөөлөгч гэдэг хүн маань өмгөөлөгчөөс гэрчийн мэдүүлэг авах гээд байдаг, өмгөөлөгчийг үйлчлүүлэгчийнх нь өмнөөс байцаах гэдэг, сүрдүүлдэг, айлгадаг. Нотолж чадахгүй болохоороо өмгөөлөгч рүү нь дайрч гутаадаг гэх мэт бүх аргийг хэрэглэдэг. Өнөөдөр ордонд том дарга хийхээрээ өмгөөлөгч, эмч хэрэггүй мэт ярьдаг. Гэтэл асуудалд орлоо гэхэд өмгөөлөгч, эмчээс өөр дэмжлэг олдоггүй. Байцаан шийтгэх хуульд өмгөөлөгч, прокурор яг тэгш байна гэсэн тэр эрх нь байна уу. Прокурорууд хаан, заан биш. Манайд өмгөөлөгчөө өмөөрөх шаардлага гарсан шүү" гэлээ.
Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна