Тэтгэврийн зээлийг тэглэхийг буруушаахгүй ч шударга бус байна
2020-01-07 14:50

Монголын Ахмадын Холбооноос иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай хуулийн төслийн талаар өнөөдөр /2020.01.07/ мэдээлэл хийлээ.

Монголын Ахмадын Холбооны Удирдах зөвлөл өчигдөр хуралдаж тэтгэврийн зээлийг тэглэх асуудлын талаар хэлэлцсэн бөгөөд өөрсдийн байр суурийг УИХ-ын гишүүдийн анхааралд хүргэхээр ийнхүү хэвлэлд хандаад байгаа аж. 

Хэвлэлийн хуралд Ахмадын холбооны ерөнхийлөгч Ц.Сүхбаатар, Дэд ерөнхийлөгч П.Бямбацэрэн, Нийслэлийн ахмадын хорооны дэд дарга О.Найдансод, Хан-Уул дүүргийн ахмадын холбооны дарга Д.Совдоо нар оролцов.

Монгол Улсын Үндэсний аюулгүй байдлын зөвлөлийн зөвлөмжийн дагуу Монгол Улсын Засгийн газраас “Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай” хуулийн төслийг УИХ-д өргөн мэдүүлсэн. Үүнтэй холбогдуулан улс орныхоо хөгжил цэцэглэлтийн төлөө ажил амьдралаа зориулж, гавьяаныхаа амралтыг эдэлж байгаа олон зуун мянган ахмад настныхаа өмнөөс Монголын ахмадын холбоо байр сууриа илэрхийлэх нь зүйтэй гэж үзжээ.

ҮАБЗ-ийн дагуу Засгийн газраас хууль өргөн барих замаар Салхитын мөнгөний ордыг барьцаалан бонд босгох замаар тэтгэврийн зээлийг тэглэж буйд талархаж байгаа ахмадууд байгаа ч гомдолтой хүмүүс ч бий гэв.  

Зээл тэглэх нь зөвхөн нэг удаагийн гал унтраасан арга хэмжээ тул нэгдсэн бодлогоор ахмадуудын тэтгэврийг нэмж, зөрүүг арилгах арга хэмжээ авахыг МАХ-ноос хүсэж байгаагаа илэрхийллээ. 

ҮАБЗ-ийн зөвлөмж гарснаас хойш ахмадуудын дунд талцал, бухимдал үүсч зээлийн хэмжээ, хугацааны ялгаа, зээлийн зориулалтаас шалтгаалж хэрхэн тэглэх бодлого нь тодорхойгүй, тэтгэврийн зээл авахгүйгээр амьдралаа арай ядан зохицуулж байгаа ахмадуудад нөхөн төлбөр олгох эсэх, байгалийн баялгийг Үндсэн хуулийн заалтад нийцүүлэн бүх ахмадад адил тэгш, шударга хувиарлагдах эсэх асуудлыг анхааран үзэж зөв шийдвэрлэх талаар ахмадууд санал бодлоо илэрхийлсээр байгаа аж. 

Тиймээс Монголын Ахмадын Холбооноос 

• Тэтгэврийн зээлийг тэглэх хувилбар нь нэг хэсэг ахмадуудын амьжиргааг түр зохицуулсан өрөөсгөл асуудал тул тэтгэвэр, орлогыг нэмэгдүүлэх, нийгмийн даатгалын тогтолцоог шинэчлэх бодитой арга хэмжээг авч хэрэгжүүлэх 

• Тэтгэврийн зөрүүг арилгах талаар үе үеийн төр засгийн газраас бодлого мөрийн хөтөлбөртөө тусгасан боловч одоо болтол арга хэмжээ аваагүй. Сүүлийн 6-7 жилд сард 20 гаруйхан мянган төгрөг нэмсэн болж адил ажил, мэргэжлийн хүмүүсийн тэтгэврийн зөрүү нь улам холдож ахмадууд хохирсоор байна. Тиймээс нэгэнт хөрөнгийн эх үүсвэр бий болсон энэ боломжийг ашиглаж, тэтгэврийн зөрүүг арилгахад хөрөнгө гаргах, эхний ээлжинд 70 ба түүнээс дээш настай 78 мянга орчим ахмадын тэтгэврийн зөрүүг бүрэн арилгаж наад зах нь 150 мянган төгрөг сар бүр зөрүүд нь олгохоор тооцоход жилдээ 140 гаруй тэрбум төгрөг гаргахаар шийдвэрлэх 

• Ахмад настнуудыг өдөр тутмын амьжиргааны баталгаатай орлого болох тэтгэврийг арилжааны банкуудын бизнесийн үйл ажиллагаа явуулах, ашиг олох бүтээгдэхүүн болгож ирсэн хууль бус үйлдлийг таслан зогсоож, зайлшгүй шаардлага гарсан нөхцөлд гурав хүртэлх сарын тэтгэврээ хүүгүйгээр урьдчилан авдаг хуулийн зохицуулалт хийж өгөх

• Сөрөг үр дагавар гаргахгүйгээр зургаан сая хүртэл төгрөгийн зээлийн өрийг тэглэх

• Зах зээлийн зарчимд нийцсэн, хамгийн гол нь ахмад настан иргэн бүр шударга, адил тэгш хүртэл зарчмаар сэтгэлийн хөөрөлд өртөлгүй шийдвэр гаргахыг хүсэж буйгаа илэрхийлсэн юм. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй