Малын хулгайчдад оногдуулах ялыг чангатгана
2020-01-10 13:23

УИХ-ын чуулганы нэгдсэн хуралдаанаар Эрүүгийн тухай хуульд нэмэлт өөрчлөлт оруулах тухай болон түүнтэй хамт өргөн мэдүүлсэн төслийн эцсийн хэлэлцүүлгийг хийж байна.

Энэ үеэр Г.Тэмүүлэн гишүүн "Малын хулгайч нарт ногдуулах ялын бодлогыг чангатгаж, 240-250 цагаар нийтэд тустай ажил эрхлэх гэдгийг өөрчлөх. Захиргааны хариуцлага ногдуулахын оронд Эрүүгийн хариуцлага оноох ёстой гэж үзэж байна. Малын хулгайтай тэмцэхэд Ялын бодлогыг чангатгахаас гадна малчдын нөхөрлөл бий болгох, мэдээллийн баазыг өргөтгөх зэргээр ажиллах шаардлага байна" гэв.

УИХ-ын гишүүн Б.Пүрэвдорж:

"2019 онд 1900 малын хулгайн гэмт хэрэг гарсан. Үүнээс 379 хэрэг шүүхээр шийдвэрлэгдсэн. 2800 орчим хүн малын хулгайн гэмт хэрэгт холбогдсон. 2800 хүнээс 592 хүн эрүүгийн хариуцлага хүлээж байгаа. Бусад 373 хүн нь тэнсэн харгалзах ял, торгуулах, нийтэд тустай хөдөлмөр эрхэлж байна.

Мөн 219 хүн шоронд хоригдож байна. Малын хулгайг бүлэглэж олуулаа хийдэг. Нэгэндээ ацагладаг. Хууль хяналтын байгууллагад баригдахаар нэгэндээ тохдог. Бүлэглэж хулгай хийхээр ял хүндэрдэг учраас ийм зохицуулалт хийж ял завшиж, 2500 -гаад хулгайч бидний дунд үлддэг. Дахиад дараагийн хулгайгаа хийдэг" гэлээ.

Харин хууль санаачлагчдын нэг УИХ-ын гишүүн Х.Нямбаатар "Эрүүгийн хуулийн тусгай ангийн 17-р зүйлд нэг толгой мал хулгайлсан бол 6 сараас дээш хугацаагаар хорих ял оноох заалт оруулсан. Өнчин ишиг хулгайлсан ч 6 сараас 5 жил хүртэл хорих ял оноохоор тусгасан. Харин нэг бод хулгайлахдаа машин механизм ашигласан, 2-оос дээш бүлэглэж хулгайлсан бол 2-8 жил хорих ял оноохоор төсөлд тусгасан. Хил орчмын бүсийн сумдад улсын хилээр мал гаргасан хэргүүд гарч байгаа тул хуулийн төсөлд хүндрүүлэх нөхцөлтэйгээр оруулж ирсэн. 

Малын хулгай сүүлийн жилд өсөж улсын хэмжээнд 2019 оны байдлаар малын хулгайн 1809 гэмт хэрэгт 1200 хүн холбогдоод байна. Тиймээс гэмт хэргээс урьдчилан сэргийлэх соён гэгээрүүлэх, гэмт хэргээс сэргийлэх чиглэлээр Засгийн газар ажиллах хэрэгтэй байна хэмээн онцлов. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй