Ерөнхий сайдад Дархан, Сэлэнгийн замын асуудлаар асуулга хүргүүлжээ
2020-01-11 12:10

Эдийн засаг, худалдааны онцгой ач холбогдолтойгоос гадна иргэдийн амьдрал тэр дундаа Дархан, Сэлэнгэ, Орхон, Булган, Хөвсгөл аймгийн иргэд, аж ахуйн нэгжийн үйл ажиллагаанд ихээхэн нөлөө үзүүлдэг Улаанбаатар-Дархан чиглэлийн авто замыг 4 эгнээ бүхий авто зам болгон өргөтгөн, шинэчлэх ажил 2019 оны арваннэгдүгээр сард дуусах байсан боловч өнөөдрийг хүртэл зам ашиглалтад ороогүй байна.

УИХ-ын гишүүн Д.Эрдэнэбат нэгдүгээр сарын 10-ны өдөр Дархан, Сэлэнгийн замын асуудлаар Ерөнхий сайдад асуулга хүргүүлсэн байна.

2019 оны арваннэгдүгээр сард дуусна хэмээн хугацаа заасан ч заасан хугацаанд ашиглалтад ороогүй, зам өргөтгөх, шинэчлэх ажил хэт удаашралтай байгаа тул ийнхүү асуулга тавьж байгаа аж.

“Улаанбаатар-Дархан чиглэлийн авто замын асуудалтай холбогдуулан Монгол Улсын Их Хурлын тухай хуулийн 7 дугаар зүйлийн 7.1.13, 33 дугаар зүйлийн 33.1.2-т заасны дагуу бүрэн эрхийнхээ хүрээнд дараах асуулгыг тавьсан байна. Үүнд:

1. Улаанбаатар-Дархан чиглэлийн авто замын өргөтгөх, шинэчлэх ажил яг хэзээ дуусах талаар,

2. Зам барих ажлын санхүүжилтийн талаарх дэлгэрэнгүй тайлбар,

3. Зам барих ажлыг ямар аж ахуй нэгжүүд гүйцэтгэж байгаа болон тус аж ахуйн нэгжүүдийн нөөц, хүчин чадлын талаар,

4. Улаанбаатар-Дархан чиглэлийн авто замын 2 эгнээг Европын сэргээн босголт, хөгжлийн банкны зээлээр барихаар шийдвэрлэсэн. Уг ажил хэзээнээс эхлэх талаар дэлгэрэнгүй мэдээлэл ирүүлнэ үү.

Энэхүү асуулгын хариуг Монгол Улсын Их Хурлын тухай хуульд заасан хугацаанд ирүүлж, улмаар Улсын Их Хурлын чуулганы нэгдсэн хуралдаанд танилцуулахыг Танаас хүсье” гэжээ.

УИХ-ын тухай хуулийн дагуу асуулгын хариуг 30 хоногийн дотор гишүүнд бичгээр өгөх ёстой.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй