Экс Ерөнхий сайд Ч.Сайханбилэгийг эрэн сурвалжилж эхэллээ
2020-01-13 08:53

Монгол Улсын Ерөнхий сайд асан Ч.Сайханбилэгийг цагдаагийн байгууллагаас эрэн сурвалжилж эхэлжээ. 

Дубайн гэрээг үзэглэхдээ албан тушаалын байдлаа ашигласан, бусдад давуу эрх олгосон байж болзошгүй гэх үндэслэлээр яллагдагчаар татагдан шалгагдаж байсан Ч.Сайханбилэгт хилийн хориг тогтоогоод байсан ч эрүүл мэндийн шалтгаанаар хил давах “эрх”-тэй болсон. Эмчилгээнд явсан экс Ерөнхий сайд ирнэ гэсэн хугацаандаа ирэлгүй хэд хэдэн удаа хойшлуулсан тул эх оронд нь авчрах дараагийн арга хэмжээг авна гэдгийг оны өмнө Авлигатай тэмцэх газраас мэдээлээд байсан юм.

ЦЕГ-ын албан ёсны сайтад мэдээлснээр Ч.Сайханбилэг нь Авлигатай тэмцэх газрын Мөрдөн шалгах хэлтэс болон Эрүүгийн цагдаагийн албаны Эдийн засгийн гэмт хэрэгтэй тэмцэх газрын Мөрдөн шалгах хэлтсийн хамтарсан ажлын хэсгээс эрүүгийн 1802001240165 дугаартай хэрэгт яллагдагчаар татагдан шалгагдаж байгаад Эрүүгийн хэрэг хянан шийдвэрлэх тухай хуулийн 14.5 дугаар зүйлийн 1 дэх хэсэгт заасан "тодорхой хүнтэй уулзахыг хориглох" хязгаарлалт тогтоох таслан сэргийлэх арга хэмжээ авагдсаны дараагаар буюу 2019 оны 08 дугаар сард хэрэгт мөрдөн байцаалтын ажиллагаа явуулж буй дээрх ажлын хэсгийн мөрдөгч нарт мэдэгдэлгүйгээр Монгол Улсын хилээр гадагш зорчин, хэрэг хянан шийдвэрлэх ажиллагаанд санаатай саад учруулж, Эрүүгийн хэрэг хянан шийдвэрлэх тухай хуулийн 7.9 дүгээр зүйлд заасан яллагдагчийн үүргийг зөрчсөн тул түүнийг эрэн сурвалжилж байна гэжээ. 

Ийнхүү Ерөнхий сайд асан Ч.Сайханбилэг эрэн сурвалжлагдаж буй анхны Ерөнхий сайд боллоо. Бүхэл бүтэн туурга тусгаар улсын Ерөнхий сайдаар ажиллаж байсан хүн, хууль тогтолцож явсан хүн хуулийн өмнө бөхийж, өөрөө ирээд хэргээ нэг талд нь гаргах уу эсвэл “чирэгдэж” ирээд шившгээ тарих уу гэдгийг харах л үлдэж байна. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй