Хилс хэргээр 30 жил хоригдсон хүн суллагджээ
2020-01-16 09:40

Гэм зэмгүй мөртлөө 30 жил шоронд суусан хүнийг цагаатгасан тохиолдол АНУ-д гарчээ.

2020 оны нэгдүгээр сарын 13-ны даваа гарагт шүүх 1991 оны шүүхийн тогтоолыг хүчингүй болгон 62 настай хоригдол Жерри Томасыг сулласан байна. 1987 онд Мичиган мужийн Детройт хотын оршин суугч нэгэн эмэгтэй машиндаа зэвсэгт халдлагын золиос боллоо хэмээн цагдаагийн газарт өргөдөл гаргажээ. Хоёр жилийн дараа хохирогч өөрт нь халдсан дээрэмчнийг Томасыг мөн гэж мэдүүлэг өгсөн байна.

Цагдаа нарт ямар ч эд мөрийн баримт, гэрчүүдийн мэдүүлэг байхгүй байсан ч шүүх ганц хохирогчийн үгээр хүнийг яллан Томасыг дээрэм, хүний амь насанд халдахыг завдсан хэргээр буруутган 50 жилийн хорих ялаар шийтгэжээ.

Хууль бусаар шийтгүүлсэн хүмүүст тусалдаг The Innocence Project ТББ-ын төлөөлөгчид 2010 оноос түүний хэргийг сөхөн судалж эхэлсэн аж.

Хохирогч хэрэг гарах үед овор хэмжээ жижигхэн Ford Escort машинтай байсныг сайн дурын хуульчид олж мэдсэн байна. Харин 1987 онд хоригдол Томас 190 см өндөртэй, 115 кг жинтэй аварга “амьтан” байсан тул жижиг машинд багтан орж, хүн дээрэмдэх боломжгүй байжээ.

“Бид түүнтэй ижил төстэй бие хаатай хүнийг Ford Escort машинд суулгаж үзсэнээ гэрэл зураг, бичлэгээр баталгаажуулсан. Үнэхээр яагаад ч хэрэг хийсэн байж таарахгүй байсан” хэмээн The Innocence Project-ийн төлөөлөгч Жэйн Пучер өгүүлэв.

Харамсалтай нь, хохирогч хэдэн жилийн өмнө таалал төгссөн болохоор хэргийг сэргээж жинхэнэ гэмт хэрэгтнийг хайх ажил нэгэнт хийгдэж чадахааргүй болсон аж.

Хийгээгүй хэргийнхээ төлөө 30 жилийг өргөст торны цаана өнгөрүүлсэн Томас тус байгууллагын сайн дурын ажилтнуудад талархал илэрхийлээд гэм буруугүй нь нотлогдон гэр бүлдээ эргэн очих болсондоо баяртай байгаагаа нулимс дуслуулан байж ярьжээ.

“Хэрвээ мөрдөн байцаагчид хэрэгт нухацтай хандан, нарийвчилсан мөрдөн шалгах ажиллагаа явуулсан бол Томас хэзээ ч шоронд суухгүй байх байлаа” гэж Пучер харамсан өгүүлэв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй