Н.Номтойбаяр гишүүний асуудлаар хуралдах Халдашгүй байдлын дэд хорооны хурал хойшлогджээ
2020-01-20 11:31

УИХ-ын гишүүн Н.Номтойбаярын бүрэн эрхийг түдгэлзүүлэх саналыг Улсын Ерөнхий прокурор Б.Жаргалсайхан нэгдүгээр сарын 16-нд УИХ-д өргөн мэдүүлсэн билээ.

УИХ-ын гишүүний Халдашгүй байдлын дэд хорооны хуралдаанаар өнөөдөр /2020.01.20/ УИХ-ын гишүүн Н.Номтойбаярын бүрэн эрхийг нь түдгэлзүүлэх хүсэлтийг хэлэлцэхээр төлөвлөж байсан ч тодорхойгүй хугацаагаар хойшлогджээ.

Гадаад томилолттой ажилласан Д.Лүндээжанцан гишүүн ирсэн байгаа ч УИХ-ын гишүүн, ХХААХҮ-ийн сайд Ч.Улаан томилолтоос ирээгүй байгаа тул ирэхээр нь дэд хороо бүрэн бүрэлдэхүүнээрээ хэлэлцэх аж.

Өнгөрөгч баасан гарагт УИХ-ын гишүүн, ХЗДХ-ийн сайд Ц.Нямдорж “Н.Номтойбаяр гишүүний бүрэн эрхийг түдгэлзүүлэх санал ирсэн. Халдашгүй байдлын дэд хороо өнөөдөр гурван гишүүнтэй дэд хороо хуралдлаа. Д.Лүндээжанцан гишүүн Ерөнхий прокурорын санал ирэхээс өмнө гадаад явсан. Ч.Улаан гишүүн санал ирсний дараагаар гадаад явсан учраас Д.Лүндээжанцан, Ч.Улаан хоёр хуралд байлцаагүй. Дэд хорооны гишүүд бүрэн ирцтэйгээр хуралдаж, шийдвэр гаргая гэж үзсэн. Д.Лүндээжанцан 19-нд ирнэ, Ч.Улааныг дуудуулна. Тиймээс хоёр гишүүнийг ирэхээр дэд хороо бүрэн бүрэлдэхүүнээрээ хуралдаж шийдвэрлэнэ. Ирэх 7 хоногт асуудлыг шийдвэрлэнэ” гэсэн юм.

Халдашгүй байдлын дэд хороонд УИХ-ын гишүүн Ө.Энхтүвшин, Ч.Улаан, Н.Энхболд, Д.Лүндээжанцан нар багтдаг бөгөөд тус дэд хороог УИХ-ын гишүүн, ХЗДХ-ийн сайд Ц.Нямдорж ахалдаг юм.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй