Г.Батхүү агсаны ар гэрийнхэнд "Би үзсэн, харсан надад 13 секундын бичлэг бий" гэсэн мессеж иржээ
2020-01-22 12:39

УИХ-ын гишүүн асан Г.Батхүү амиа алдсан хэрэгтэй холбогдуулан түүний гэр бүлийнхэн өнөөдөр /2020.01.22/ хэвлэлийн хурал хийлээ. Хэвлэлийн хуралд талийгаачийн охин Б.Цэлмэг, хүү Б.Ганхөлөг, өмгөөлөгч н.Батхуяг нар оролцлоо.

УИХ-ын дэд дарга, УИХ-ын гишүүн асан, Ардчилсан Намын дэд дарга Г.Батхүү 2019 оны тавдугаар сарын 17-ны өдөр Төрийн ордонд таалал төгссөн бөгөөд хэрэг гарснаас хойш гэр бүлийнхэн нь өнөөдрийг хүртэл ямар нэг мэдээлэл хийгээгүй байсан юм.

Сүүлийн үед хэргийг улс төрийн зорилгоор ашиглах байдал ажиглагдаж байгаа тул гэр бүлийнхэн нь өөрсөддөө байгаа мэдээллээ хүргэхээр хэвлэлийн хурал хийж байгаа талаараа тайлбарлалаа. 

Өмгөөлөгч н.Батхуяг “Төрийн ордонд 2019 оны тавдугаар сарын 17-ны өдөр УИХ-ын гишүүн Г.Батхүү агсан зуурдаар нас барсан. Цагдаагийн байгууллагаас  энэ хэргийг шалгаад найман сар өнгөрсөн ч хэрэг шийдэгдээгүй байна.

Өнгөрсөн хугацаанд ямар нэгэн мэдээлэл хийгээгүй. Хэргийн үйл явцын талаар гаднын нөлөөгүй юм байна гэсэн мэдээлэл хэвлэлээр явахад ар гэрийнхний зүгээс хүлээцтэй тэвчээртэй явсан.

Монгол заншлаа бодсон ч гэсэн бурхан болоочийн ясыг байнга өндөлзүүлээд яриад байх нь зохимжгүй. Энэ ч утгаараа албан ёсны мэдээлэл хийгээгүй байсан. Харин сүүлийн үед хэргийн талаар улстөржүүлэх, хэргийг улс төртэй хутгах, зарим талаар улс төрийн зорилгоор ашиглах явдал илт болоод ирлээ.

Нэгдүгээрт, энэ хэрэг дээр шүүх эмнэлгийн багийн дүгнэлт эцэслэж гарсан. Дүгнэлтийг дэлгэрэнгүй унших боломжгүй, яагаад гэвэл олон хуудас, эмнэлзүйн үг хэллэг ихтэй учраас дэлгэрэнгүй уншиж танилцуулах боломжгүй байна. Анхаарал татсан хэдэн зүйлийг хүргэе.

Талийгаачийн баруун нүдний чиглэлд хүч үйлчилснээр баруун нүдэнд хөхрөл, хавдар үүссэн. Задлан шинжилгээний явцад хүзүүний зүүн хажууд 7х0.5 см урттай улайлт үүссэн. Энэ бол боолтын улмаас үүсч болдог улайлт л даа. 

Хэвлэл мэдээллийн хэрэгслүүдээр талийгаачийг өвчний улмаас ухаан алдаад уначихлаа гэж их гарсан. Дүгнэлтээр бол өвчний улмаас цус харваагүй. Гэмтлийн гаралтай цус харвалт тархинд үүссэн байна гэсэн дүгнэлт гарсан.

Энэ хэрэг дээр УИХ-ын нэр бүхий гишүүнээс полиграф тест авсан. Дүгнэлтээр, асуусан асуултад хариулахдаа сэтгэл санааны хувьд гэм буруугийн түгшүүрийн мэдрэмж өндөр гэсэн магадлагаа гарсан.

Хэргийн газраас талийгаачийн гар утсыг хураан авсан байдаг. Үзлэг шинжилгээ хийгээд хохирогчид хүлээлгэж өгсөн. Хохирогч гар утсыг хүлээж аваад шинжилгээний дүгнэлттэй танилцахад гар утсанд ямар нэгэн мэдээлэл байгаагүй. Үйлдвэрээс гарсан factory reset гэж бидний ярьдаг, гар утсыг анх худалдан авахад ямар байдаг билээ, яг тийм болсон байдалтай байсан. Шинжилгээний дүгнэлтээр ч гэсэн гар утсанд ямар нэгэн мэдээлэл байхгүй, түүнийг сэргээх боломжгүй гэсэн дүгнэлт гарсан.

Хэргийг шалгах явцад хохирогчийн ар гэрийнхэн лүү нэр бүхий этгээд "Би үзсэн, харсан надад 13 секундын бичлэг бий" гэж мессеж бичсэн. Энэ мэдээллийг шалгах явцад нэг хүн тогтоогдсон. Тэр хүн одоо энэ хэргийн талаар би мэдэхгүй, хараагүй гээд өөр хэрэгт шалгагдаж байгаа байдлаар явж байгаа юм билээ. Цагдаагийн байгууллага энэ асуудлыг шалгаж байгаа юм байна лээ. 

Мөрдөн шалгах ажиллагааны явцад өөр бусад асуудал байсан. Ялангуяа, шүүх эмнэлэгтэй холбоотой. Задлан шинжилгээ хийлгэхийн өмнө талийгаачийн ар гэрийнхэн MRI-д оруулья, рентген зураг авахуулья гэхэд шүүх эмнэлгийнхэн хүлээж аваагүй. Шинжилгээний явцад оношийг дутуу тавьсан, шинжилгээг дутуу хийсэн ийм зүйлс тогтоогдсон.

Гар утасны хувьд цагдаагийн байгууллага гар утсан дээр шинжээч томилохдоо утасны гадаргуу дээр хурууны хээ, биологийн ул мөр байгаа эсэхийг шинжилгээнд өгч, тогтоох ёстой. Гэтэл түүнээс нь өмнө дотор нь юу байна вэ гэдгийг тогтоох шинжээч томилсон” гэлээ.

Талийгаачийн хүү Б.Ганхөлөг "Бид найман сарын хугацаанд тэвчээртэй ажиглаж суулаа. Бидний хувьд их хэцүү найман сар өнгөрлөө. Эмээ, өвөө, ээж маань гээд их хэцүү цаг хугацаа өнгөрч байна. Дөрвөн настай бага дүү маань хоол ундаа идэхгүй их хэцүү байна. 2019 оны тавдугаар сарын 17-нд цоо эрүүл аав маань өглөө гэрээсээ гараад явсан. Төрийн тусгай обьектод албан үүргээ гүйцэтгэж яваад эргэж ирсэнгүй. Бид гадны нөлөөтэй гэж үзэж байна. Өндрөөс унасан гэж байгаа ч унасан талын нүд нь хэвийн хэр нь нөгөө талын нүд нь нэлээд том хавдартай байсан. Хүзүүн дээр гарсан улайлт нь заамдалтын улмаас гарсан гэж бид хардаж байгаа. Өмгөөлөгч ч хэллээ. 

Бид ямар нийгэмд амьдраад байна вэ. Амьд явах баталгаа байна уу? Цаашдаа яаж амьдрах вэ? Төр нийгмийн зүтгэлтэн, УИХ-ын гишүүн, Засгийн газрын гишүүн, УИХ-ын дэд даргаар ажиллаж байсан хүн Төрийн ордонд амиа алдаад найман сар өнгөрч байхад ямар ч шийдэл гарч ирсэнгүй. Жирийн ард иргэдэд ийм зүйл тохиолдвол яах вэ гэдэг нь ой тойнд буухгүй байна. 

Төртэй улс, шүүх засаглалтай улс байна, энэ хэргийг яаралтай, үнэн зөв шийдэж өгнө гэдэгт итгэлтэй, итгэл алдрахгүй хүлээсээр байна" гэв.

Талийгаачийн охин Б.Цэлмэг "Бидэнд үнэхээр хэцүү байна. Аав нь ирлээ гээд орой ороод ирэх юм шиг санагдаж байна. Эмээ, өвөө минь өдөржин зурагных нь өмнө сууж байна. Насаараа ханилсан ээжид маань, дөрөвхөн настай дүүд маань үнэхээр хэцүү байна. Бид шударга ёсны төлөө, хэргийг үнэн зөвөөр шийдүүлэхийн төлөө тэмцэх болно" гэсэн юм. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй