Авлига нэхсэн гэх хурандааг ажлаас нь чөлөөлж, хэргийг шалгаж эхэлжээ
2020-01-22 14:35

Цагдаагийн алба хаагч, хурандаа Б.Цогтбаяр хоёр жилийн турш шинэ орон сууц, мөнгө нэхэн дарамталж байгаа тухай өчигдөр /2020.01.21/ болсон хэвлэлийн бага хурлын үеэр “Бавгар” компанийн захирал Х.Оюун мэдэгдсэн.

Тус компани 2015 оны есдүгээр сард ЦЕГ-ын алба хаагч, хууль сахиулагчдын 376 айлын хотхоныг барих гэрээг байгуулжээ. Тэрээр 2018 оны нэгдүгээр сараас эхлэн тус компанийн захирлын ажлыг хашиж байгаа аж. Өмнө нь түүний ээж захирлаар нь ажиллаж байгаад 2017 онд ослын улмаас амиа алдсан учир ээжийнхээ хийж байсан ажлыг хүлээн авчээ. 

Тэгвэл өнөөдөр /2020.01.22/ Цагдаагийн ерөнхий газраас цагдаагийн алба хаагч авлига авсан эсэхийг шалгаж, тогтоохоор ажлын хэсэг гарсан талаар тайлбар, мэдээлэл хийлээ.

ЦЕГ-ын дэд дарга, цагдаагийн хурандаа Ж.Болд "Цагдаагийн байгууллагын алба хаагчтай холбоотой мэдээлэл өчигдөр /2020.01.21/ хэвлэл мэдээллийн байгууллагаар цацагдсан. Үүнтэй холбоотойгоор манай байгууллагаас ажлын хэсэг байгуулж, шалгалтын ажлыг хийж байна. Цагдаагийн алба хаагчийн нийгмийн асуудлыг шийдэхээр “Бавгар” гэдэг компанитай цагдаагийн алба хаагчид гэрээ байгуулж, орон сууц бариулахаар болсон. Өнөөдрийн байдлаар нэг корпус нь ашиглалтад орж, нэг корпусын суурийн ажил явж байна.

Хэвлэл мэдээллээр нийтлэгдсэн мэдээлэлтэй холбогдуулан Цагдаа, дотоодын цэргийн нэгдсэн сургалтын төвийн дарга, хурандаа Б.Цогтбаярыг ажлаас чөлөөлж, сахилга ёс зүй, гэмт хэргийн шинжтэй үйлдэл байгаа эсэхийг шалгахаар ажиллаж байна” гэв.

Мөн “Хэвлэл мэдээллээр өгсөн мэдээллийг нягталж шалгаж байна. Өмнө нь цагдаагийн байгууллагад хоёр удаа өргөдөл, гомдол өгч байсан гэж хэлсэн. Өнгөрсөн 2018 онд “Бавгар” компанийн зүгээс “Цагдаагийн алба хаагчид мөнгөө өгөөгүй байна” гэдэг асуудлаар хандаж байсан.Тухайн үед ажлын хэсэг гаргаж, шалгаад ажлын хэсгийн ахлагч нарыг сольсон. Энэ авлигын асуудалтай холбоотой өргөдөл, гомдол ЦЕГ-т өмнө нь ирүүлж байгаагүй гэж ойлгож байна. Хэвлэл мэдээллээр яригдсан, нэр дурдагдсан цагдаагийн хурандаа нарыг шалгаж, тогтооно. Цагдаагийн ерөнхий газраас шударга бус үйлдэл, сахилга, ёс зүйн зөрчилтэй эвлэрэхгүй. Цагдаагийн ерөнхий газраас ямар нэгэн байдлаар тус компанид шахалт дарамт үзүүлэх асуудал байхгүй” гэлээ.

 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй