Ерөнхий сайд асан Ч.Сайханбилэгийг “Amsterdam & Partners LLP” хуулийн фирм өмгөөлнө
2020-01-23 12:27

Монгол Улсын Ерөнхий сайд асан Ч.Сайханбилэг АНУ болон Их Британид төвтэй “Amsterdam & Partners LLP” хуулийн фирмээр өмгөөлүүлэхээр болсон тухай тус компанийн цахим хуудас мэдээлсэн байна.

"2014-2016 онд Монгол Улсын Засгийн газрын тэргүүнээр ажиллаж байсан Ч.Сайханбилэг нь ажиллах хугацаандаа “Рио Тинто” компанитай Оюутолгойн хөрөнгө оруулалтын гэрээг байгуулж байв. Түүнийг энэ гэрээг байгуулахдаа хууль зөрчсөн гэж үзээд Монголын прокурор дөрвөн төрлийн ял төлөвлөөд байгаа ба энэ нь ямар ч үндэслэлгүй, нотлох баримтгүй юм.

Шүүхийн хараат бус байдал, хуульт ёсонд Монгол Улсын одоогийн Засгийн газар халдаж байна. Ерөнхий сайд асан Сайханбилэг энэхүү уул уурхайн гэрээг байгуулахдаа ил тод, парламентаас олгосон эрхийн дагуу ажилласан гэж бид үзэж байна” гэж Amsterdam & Partners LLP фирмийн үүсгэн байгуулагч Роберт Амстердам мэдэгджээ.

Ч.Сайханбилэгийг Монголд хууль бусаар баривчлагдаж, саатуулагдсаныхаа дараа АНУ-д амьдарч байгааг тус сайтад мэдээлсэн байна. Мөн Монгол Улсын ерөнхийлөгч Х.Баттулгыг 2017 онд сонгогдсоноос хойш Ардчилсан Намын хэд хэдэн улс төрчөөс гадна шүүхийн хараат бус байдал, хэвлэлийн эрх чөлөө улс төрийн дарамт шахалтад өртөх болсныг мэдээлжээ.

Тус хуулийн фирмийг үүсгэн байгуулагч-түнш Роберт Амстердам нь олон улсад нэр хүндтэй хуульч бөгөөд  37 жилийн турш дэлхийн улс орнуудын төр, засгийн тэргүүн болон томоохон корпорациудын захирлуудад зөвлөгөө өгөх болон өмгөөлөх үйлчилгээ үзүүлж байгаа гэнэ.

Тэрбээр оросын нэрт бизнесмэн, улс төрийн хоригдол Михаил Ходорковскийг өмгөөлж байсан аж.

Эх сурвалж: amsterdamandpartners.com

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй