Монголбанк: Ариг банкны санхүүгийн үзүүлэлтүүд хэвийн байгаа
2020-01-27 13:46

Ариг банк Монголбанкны Ерөнхийлөгчийн тушаалаар өгөгдсөн үүрэг даалгаврыг биелүүлээгүй, хувь нийлүүлэгчдийн хооронд маргаан үүссэнээс хувьцаа эзэмшигчдийн хурлаар маргаантай асуудлаа шийдвэрлэж чадахгүй, төлөөлөн удирдах зөвлөл эрх зүйн чадамжгүй болсон тул зохистой засаглал алдагдсан.

Иймд Монголбанкны Ерөнхийлөгчийн 2020 оны нэгдүгээр сарын 24-ний өдрийн тушаалаар харилцагч, хадгаламж эзэмшигчдийн хөрөнгийг хамгаалах үүднээс Банкны тухай хуульд заасны дагуу нөхцөлт удирдлагын арга хэмжээг хэрэгжүүлэхээр болжээ. Энэ талаар өнөөдөр төв банкнаас мэдээлэл хийлээ.

Монголбанкны Хяналт, шалгалтын газрын захирал Н.Батсайхан: 

"Бид Ариг банкинд нөхцөлт удирдлагын арга хэмжээг авахаар боллоо. Банкны эздийн хооронд маргаан гарч, ТУЗ-ийн гишүүдээ бүрэн томилж чадахгүйд хүрсэн. 2019 оны эцсийн байдлаар тус банк өөрийн хөрөнгийн хүрэлцээ болон төлбөр түргэн гүйцэтгэх шаардлагуудыг хангаж байгаа юм. Өөрөөр хэлбэл банкны санхүүгийн үзүүлэлтүүд хэвийн. Иймд бид тус банкны удирдлагыг түр хугацаанд хүлээн авсан. Зохистой засаглалыг сэргээн, Монголбанкнаас өгсөн үүрэг даалгаврыг биелүүлсний дараа бүрэн эрхт төлөөлөгчийг эргүүлэн татна. Хуульд нэг хүртэл жилийн хугацаатай томилохыг зөвшөөрдөг ч бид энэ удаад гурван сарын турш ажиллуулна.

Иймд тус банкны харилцагч, хадгаламж эзэмшигчид тайван байж болно. Албан бус мэдээнд бүү автаарай. Энэ банк банкны системийн 0.3 хувийг эзэмшдэг.

Бүрэн эрхт төлөөлөгч гүйцэтгэх захирлын үүргийг гүйцэтгэнэ гэсэн үг. Энд банк татан буугдах тухай асуудал байхгүй. Бүрэн эрхт төлөөлөгчөөр чухам хэнийг томилсныг ил тод зарлах шаардлага байхгүй" гэв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй