Худал дуут мессэж тараасан иргэн Г-г тогтоон шалгаж эхэлжээ
2020-02-13 11:58

Нийгмийн сүлжээ болон хувийн чатаар ирж байгаа “Дайны бэлэн байдалд шилжих шийдвэр ҮАБЗ-өөс гаргасан. Хөвсгөлд нэг хүн коронавирусийн халдвар авсан нь баталгаажсан” гэх дуут мессеж нь худал, ташаа гэдгийг ЭМЯ-наас мэдэгдсэн.

Зохион байгуулалтайгаар худал ташаа мэдээлэл тарааж, нийгмийг айдаст автуулах, эмх замбараагүй байдал бий болгохыг хүсч буй нийгмийн сүлжээний хэрэглэгчийг хуулийн байгууллагад хандан шалгуулж, хариуцлага тооцно гэж мэдээлсэн.

ЭМЯ-ны ээлжит хэвлэлийн бага хурлын үеэр ЦЕГ-ын Нийтийн хэв журам хамгаалах газрын дарга, цагдаагийн дэд хурандаа П.Эрдэнэбат "Энэ бол удаа дараа яригдаж байгаа асуудал. Нийгэмд, цахим орчинд худал мэдээлэл тараах, иргэдийг төөрөгдүүлэх явдал их гарч байна. Хуурамч мэдээлэл тарааж байгаа үйлдлээ таслан зогсоохыг цагдаагийн байгууллагаас анхааруулж байна. Энэ дуут мессэжийг тараасан Чингэлтэй дүүргийн иргэн Г-г олж тогтоон, холбогдох шалгалтын ажиллагаа явуулж байна. Худал мэдээллийг таслан зогсоох хэрэгтэй. Энэ мэт худал мэдээлэл тараавал хуулийн дагуу хатуу хариуцлага тооцно гэдгийг хариуцлагатайгаар мэдэгдэж байна.

Ташаа мэдээллийг хувь хүний хаягаар тарааж байгаа тул түүнийх нь дагуу хаягийг тогтоож, шалгалтын ажил явагдаж байгаа. Одоогийн байдлаар худал мэдээллийг цахим орчинд тараасан 10 үйлдлийг шалгаж байна.

Худал мэдээлэл тараасан иргэнийг Зөрчлийн хуулиар 2 сая төгрөг, ААН-ийг 20 сая төгрөгөөр торгох хуулийн заалттай. Мөн шалгалтын явцад тогтоогдох нөхцөл байдлаас хамаарч, Эрүүгийн хариуцлага хүлээлгэх хүртэл арга хэмжээ авна" гэв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй