Баян-Өлгийд тусгаарлагдсан иргэнээс шинэ төрлийн коронавирус илрээгүй байна
2020-02-14 10:56

Эрүүл мэндийн яамнөөс өчигдөр мэдээлэл хийх үеэр БНХАУ-ын Эрээн, Бээжин хотоор зорчоод ирсэн нэгэн иргэн халуурч, ханиалгасан, булчин өвдсөн гэх мэт шинж тэмдэгтэйгээр Баян-Өлгий аймагт тусгаарлагдаад байгаа тухай тус яамны Эмнэлгийн тусламж үйлчилгээний газрын дарга Я.Буянжаргал ярьсан.

Тэгвэл Баян-Өлгий аймагт тусгаарласан уг иргэний шинжилгээний хариу сөрөг гарсан буюу шинэ төрлийн коронавирус илрээгүй хэмээн ХӨСҮТ-өөс өнөө өглөө мэдээллээ.

Баян-Өлгий аймагт тусгаарласан иргэн нэгдүгээр сарын 10-нд Эрээн рүү гарсан. Нэгдүгээр сарын 12-нд Эрээнээс цаашаа яваад хоёрдугаар сарын 02-нд Эрээнд буцаж ирсэн. Ингэснээ дахин Бээжин рүү явж тэндээ 2 хоноод хоёрдугаар сарын 04-нд Эрээнд гурав дахиа ирсэн. Маргааш нь буюу хоёрдугаар сарын 05-нд Монгол улсын хилээр 48 хүнтэй автобусаар орж ирээд Замын-Үүдэд 3, Улаанбаатарт 2 хоноод хоёрдугаар сарын 07-нд 40 хүнтэй автобусаар Ховд аймаг руу явсан. Тэр автобус замдаа Булганы Сансар сум, Ховдын Дарви суманд тус тус зогсож хооллосон. Ийнхүү тэр хүн Ховдод зочид буудалд 2 хоноод, Баян-Өлгий аймаг руу 4 хүнтэй таксинд суун очсон. Үүний дараа халуурч, ханиалгаад байна, булчин өвдөж, гүйлгэж байна гэсэн зовууртайгаар тусгаарлагдсан юм.

Я.Буянжаргал "Тухайн иргэн бүх зовуур, явсан замаа бидэнд мэдээлээгүй. Үүнийг бид таксины жолоочийг нь хайж, автобусанд байсан 40 хүнийг нэр усаар нь хайж байж бүх хүнд зөвлөгөө өгсөн. Зөвхөн энэ тохиолдолд бид Ховд, Булган, Баян-Өлгий, Говь-Алтай, Дорноговь, Төв аймгийн эрүүл мэндийн салбаруудыг ажиллуулсан. Ингэж хүндрэл учруулмааргүй байна" гэсэн юм.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй