Сургууль, цэцэрлэгийн үйл ажиллагаа эхлэх хугацааг 3-р сарын 30-ныг хүртэл сунгалаа
2020-02-19 09:38

Засгийн газрын өнөөдрийн хуралдаанаар сургууль, цэцэрлэгийн үйл ажиллагаа эхлэх хугацааг 2020 оны гуравдугаар сарын 30-ныг хүртэл сунгах шийдвэрийг гаргасан байна.

Бүх ерөнхий боловсролын сургууль, цэцэрлэг, их, дээд сургууль, МСҮТ-ийн үйл ажиллагааг шинэ коронавирусийн халдвараас урьдчилан сэргийлэх зорилгоор гуравдугаар сарын 2-ныг хүртэл зогсоогоод байсан юм.

Засгийн газрын хуралдаан үргэлжилж буй бөгөөд одоогийн байдлаар гаргасан шийдвэрийн талаар Батлан хамгаалахын сайд Н.Энхболд танилцуулж байна.

Тэрбээр "Засгийн газрын хуралдаан үргэлжилж байна. БНХАУ-д өргөн тэмдэглэдэг хаврын баяраар хөдөлгөөн их байсан учраас өвчин түргэн тархах нөхцөл болсон гэж үзэж байгаа юм байна. Нууц үе урт. Манай улсаас БНХАУ-д ажиллаж амьдарч, аялаж байгаад ирсэн 179 иргэнд ажиглалт хийж, шинжилгээ авсан. Нэгдүгээр сарын 30-ны өдөр УОК-ын даргын шийдвэрээр байгуулсан ажлын хэсэг салбар дундын судалгаа хийхэд Монгол Улсад зөөвөрлөгдөн орж ирэх магадлал өндөр гэсэн үнэлгээ гарсан. Засгийн газар нөхцөл байдлыг хэлэлцээд гамшгаас хамгаалах өндөржүүлсэн бэлэн байдлын зэрэгт хэсэгчилсэн байдлаар шилжүүлсэн шийдвэрийг 2020 оны гуравдугаар сарын 30-ны өдрийг хүртэлх хугацаагаар сунгах тухай Засгийн газраас тогтоол гаргалаа. БНХАУ-д гарсан халдварын тархалт буурахгүй байгаа тул ийнхүү сунгаж байна" гэлээ. 

Гамшгаас хамгаалах өндөржүүлсэн бэлэн байдлын зэрэгт хэсэгчилсэн байдлаар шилжүүлсэн шийдвэрийг ийнхүү сунгаснаар цэцэрлэг, сургууль, их дээд сургууль, сургалтын төвүүдийн сургалтын үйл ажиллагаа хойшлоод зогсохгүй олон нийтийн хамарсан үйл ажиллагаа зохион байгуулж болохгүй. 

Харин сар шинийн өдрүүдэд хот хоорондын замыг хаах асуудлын талаар одоогоор хэлэлцээгүй, цагаан сар болоход нэлээд хоног дутуу байгаа тул нөхцөл байдлыг харгалзан үзэж шийдвэр гаргана гэдгийг Батлан хамгаалахын сайд Н.Энхболд хэлсэн юм. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй