Амиа алдсан бүсгүйн нас барсан шалтгаан нөхцлийг тогтоохоор ажиллаж байна
2020-02-19 13:52

Говь-Алтай аймгийн Гэр бүл, хүүхэд залуучуудын хөгжлийн газарт ажилладаг байсан 30 настай Б өнөөдөр үүрээр автомашиндаа нас барсан байдалтай олдсон гэдэг мэдээлэл цацагдаад байгаа. Энэ асуудлаар ЦЕГ-ын Хэвлэл мэдээллийн төвийн ахлах мэргэжилтэн, цагдаагийн ахмад М.Мөнхшүр дөнгөж сая /2020.02.19/ мэдээлэл хийлээ.

Тэрбээр “Өнөөдөр өглөө буюу хоёрдугаар сарын 19-ний үүрийн 04.20 цагийн орчим Говь-Алтай аймгийн Есөнбулаг суманд иргэн автомашиндаа нас барсан гэсэн дуудлага цагдаагийн байгууллагад ирсэн.

Дуудлага мэдээллийн дагуу тус аймгийн цагдаагийн газрын жижүүрийн бүрэлдэхүүн мөн ахлах мөрдөгч нарын ахалсан бүрэлдэхүүн хэргийн газарт ажиллалаа. 

Тухайн хэргийн газарт 30 настай Б гэгч эмэгтэй нас барсан нөхцөл байдал тогтоогдоод, шалгалтын ажиллагаа үргэлжилж байна.

Урьдчилсан байдлаар, аймгийн Засаг дарга, удирдлагууд болон нэр бүхий хүмүүс аймгийн Засаг даргын ямар нэгэн өрөөнд нь архи, согтууруулах ундаа хэрэглэсэн байж болзошгүй гэсэн нөхцөл байдал тогтоогдоод, шалгалтын ажиллагаа үргэлжилж байна.

Талийгаач Б ямар шалтгааны улмаас нас барсан, нас барах болсон шалтгаан нөхцлийг тогтоохоор шүүх эмнэлэгт задлан шинжилгээг томилоод шинжээчийн дүгнэлт гарахыг хүлээгээд ажиллаж байна.

Өндөржүүлсэн бэлэн байдал зарласан үеэр хүмүүсийг бөөгнөрүүлж архидан согтуурсан нь тогтоогдвол цагдаагийн байгууллагаас тухайн эрх бүхий хүмүүст хариуцлага хүлээлгэнэ. Хэргийг шалгаж байна. Гэм буруугийн асуудлыг ярихад арай эрт байна. Шалгалтын ажилд хугацаа орно. Гэрчүүдээс мэдүүлэг авч байна” гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй