БНСУ, Япон, Сингапурт халдварын тоо нэмэгдсээр байгаа учир анхаарал, сэрэмжээ сулруулж болохгүй
2020-02-20 12:27

Эрүүл мэндийн яамнаас коронавирус /COVID-19/-ийн халдварын нөхцөл байдал, урьдчилан сэргийлэх асуудлаар мэдээлэл хийж байна. 

ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Ухань хотод өвчлөл гарснаас хойш анх удаа 1812 хүн эмчлэгдэн гарсан таатай мэдээ байна. Гэсэн хэдий ч манай иргэдийн их зорчдог БНСУ, Япон, Сингапур зэрэг улсад халдварын тоо нэмэгдсээр байгаа учир анхаарал, сэрэмжээ сулруулж болохгүй.

ЭМЯ-аас олон хүн нэг дор цуглахгүй байх нь халдвар тархахгүй байж сэргийлж чадна гэж үзэж байгаа. Иймд Сар шинийн баяраар айл хэсэхгүй байх хэрэгтэй. Хүн олноороо тархсан газар халдвар авах эрсдэл их бий. Хүн амын бөөгнөрөл нь өвчнийг тараах өндөр эрсдэлтэй байна. Тиймээс хүн бүр дор бүрнээ онцгой анхаарах хэрэгтэй.

Нэгдүгээрт, аль болох даарч хөрөхгүй байх, дулаан хувцаслах. Хоёрдугаарт, халуун шөл, шингэн зүйлийг ихээр уух. Гуравдугаарт, дасгал хөдөлгөөн хийх. Дөрөвдүгээрт, сайн унтаж амрах, стрессдэхгүй байх гэх мэтчилэн дархлаа сайтай байхыг эрдэмтэн судлаачид, ДЭМБ-ынхан зөвлөж байгаа” гэлээ.

ДЭМБ-ын ажилтан О.Ариунтуяа “Хоёрдугаар сарын 20-ны байдлаар COVID-19-ийн халдварын нийтдээ 75292 тохиолдол бүртгэгдэж, БНХАУ-аас бусад улсад 1900 гаруй тохиолдол, таван нас баралт бүртгэгдсэн байна. Иран улсад нас баралтын хоёр тохиолдол гарсан. Хятад улс албан ёсны мэдээгээ Дэлхийн эрүүл мэндийн байгууллагад нэгтгэж хараахан ирүүлээгүй байна. Хэдийгээр шинэ тохиолдлын тоо буурах хандлагатай байгаа ч тогтвортой буурна гэж үзэхэд эрт, нөхцөл байдал, авч буй арга хэмжээнээс хамааран яаж ч эргэж болохоор байна” гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй