Зээгээ өөрөө тээж төрүүлэхээр болжээ
2020-02-21 09:52

Англи бүсгүй үргүйдэлтэй охиныхоо хүүхдийг тээж төрүүлэхээр зориг шулуудсан байна.

Нориж хотын оршин суугч 21 настай Жасмин Боули (Jasmine Bowley) балчир наснаасаа Юингийн саркома буюу хорт хавдар өвчинтэй тэмцсэн гэнэ. Хорт хавдарын эсүүд бусад эрхтэнд нь үсэрхийлэхээс сэргийлж түүнийг долоон настай байхад нь өндгөвчийг авч, цацрагийн эмчилгээ хийсний уршгаар умай нь гэмтсэн байна.

Бүсгүй насанд хүрчихээд эх болох найдвараа алдахыг хүсээгүй тул дааврын эмчилгээ хийлгэсэн ч харамсалтай нь үр дүнд хүрээгүй аж. Түүнд тээгч эхээр хүүхдээ тээж төрүүлэн эх хүн болох л ганц боломж үлдсэн байна.

27 настай найз залуу Дэниел Белл (Daniel Bell) болон өөрийн ээж 39 настай Сабрина нартай Жасмин энэ асуудлаа зөвлөлдөхөөр шийджээ. Гэтэл эх нь хүүхдийг нь тээж төрүүлэх саналыг гаргасан гэнэ. Донорын өндгөн эс, Дэниелийн эр бэлгийн эсийн тусламжтайгаар үр тогтоолгох аж.

Дөрвөн хүүхэд төрүүлж өсгөсөн арвин туршлагатай тул Сабрина ямар нэгэн асуудал гарахгүй байх хэмээн найдаж байгаа гэнэ.

“Би охиныхоо мөрөөдлийг биелүүлэхийн төлөө энэ бүхнийг хийхэд бэлэн байна. Бага балчир наснаасаа хүнд өвчнийг даван туулж чадсан охиноороо би бахархдаг учраас түүнд эх болохын аз жаргалыг мэдрүүлэхэд нь туслахыг хүсч байна” хэмээн өгүүлэх Сабринагийн санаачлагыг гэр бүлийнхэн болон найз нөхөд нь дэмжсэн байна.

Одоо тэдний гэр бүл өртөг өндөртэй үр шилжүүлэн суулгах хагалгаа, үйлчилгээний төлбөрийг босгохоор хандив цуглуулж эхэлжээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй