БНСУ-аас ирсэн зургаан оюутныг ХӨСҮТ-ийн ажиглалтад авчээ
2020-02-21 12:22

Шинэ коронавирусийн /COVID-19/ халдварын нөхцөл байдал, урьдчилан сэргийлэхээр хэрэгжүүлж буй ажлуудын талаар Эрүүл мэндийн яам ээлжит мэдээллээ өглөө.

ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Сүүлийн 24 цагийн дотор Өмнөд Солонгос улсад халдвар нэлээн эрчимтэй тархаж, 56 тохиолдлоор нэмэгдэн нийт халдварын тоо 158 болжээ.

Тус улсын Сөүл, Дэгү, Чежү, Куанжү зэрэг дөрвөн том хот болон зургаан мужид халдвар бүртгэгдсэн байна. Ялангуяа Дэгү хотод халдвар нилээд эрчтэй тархаж байна.

Тус хотын удирдлагууд иргэддээ аль болох олон нийтийн газар, эмнэлгээр явахгүй байх, явсан тохиолдолд заавал амны хаалт хэрэглэх, хоол хүнсээ гүйцэд болгож идэх, гараа тогтмол савандаж угаах, ямар нэгэн хэмжээгээр ханиаж, найтааж, халуурч байгаа амьсгалын замын өвчтэй хүнээс хол байх, амьсгалын замын өвчний шинж тэмдэг илэрвэл амны хаалт зүүж, эмнэлэгт яаралтай хандах зэрэг зөвлөмжийг өгч байгаа юм байна. Мөн 1335, 1339 дугаарт залгаж зөвлөгөө авах боломжтой гэсэн мэдээллийг өгч байна.

БНСУ-д манай улсын 48 мянга гаруй иргэн амьдарч байгаа. Иргэд маань Өмнөд Солонгосын ЭМЯ болон манай ЭМЯ-наас өгч байгаа заавар, зөвлөмжүүдийг дагаж хэрэгжүүлэх, Эрүүл Мэндийн Яамны 24 цагаар ажиллаж байгаа 323002 утсанд хандан зөвлөмж авч болно" гэдгийг хэвлэлийн хурлын эхэнд хэллээ.

ХӨСҮТ-ийн Тандалт судалгааны албаны дарга А.Амбасэлмаа "Хоёрдугаар сарын 19-нд ХӨСҮТ-д нэг хүнийг, Завхан аймагт нэг хүнийг тусгаарлаж, лабораторийн шинжилгээ хийсэн. Хоёр шинжилгээний хариу сөрөг гарч, коронавирусийн халдвар илрээгүй.

БНСУ-ын Дэгү хотоос Бусан-Улаанбаатарын онгоцоор өчигдөр орой ирсэн зургаан оюутныг ХӨСҮТ-д тусгаарлаж, ажиглалтад авлаа. Дэгү хотод коронавирусийн халдварын 80 хувь нь гарч байна. Тус хотод монгол оюутнууд олноор сурдаг юм байна. Сургуулиуд нь өвлийн ээлжит амралтаа амар, дуудсан цагт ирээрэй гэсэн учраас монгол оюутнууд маань эх орондоо ирсэн. Оюутнуудын биеийн байдал сайн, ямар ч эмнэлзүйн шинж тэмдэг илрээгүй, халуураагүй. Шинжилгээний хариу гараагүй байна" гэв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй