Говь-Алтай аймгийн Засаг дарга В.Рэнцэндоржийг үүрэгт ажлаас нь чөлөөлжээ
2020-02-21 14:06

Засгийн газрын хэрэг эрхлэх газрын дарга Л.Оюун-Эрдэнэ Говь-Алтай аймгийн Засаг дарга В.Рэнцэндоржийг үүрэгт ажлаас нь чөлөөлсөн болохыг мэдээллээ.

Тэрбээр "Ерөнхий сайд У.Хүрэлсүх Цагдаагийн Ерөнхий газрын даргатай уулзаж, зохих мэдээллийг авсан. Говь-Алтай аймгийн Засаг дарга ажлын байрандаа архидан согтуурах тухай Засгийн газрын тогтоолыг зөрчсөн нь тогтоогдсон. Энэ үндэслэлээр хариуцлага хүлээлгэж байгаа гэж ойлгож болно.

Энэ асуудлаар В.Рэнцэндоржтой холбогдсон. В.Рэнцэндорж Засгийн газрын тогтоолыг зөрчсөн гэдгээ хүлээн зөвшөөрч, ёс зүйн хариуцлага хүлээхэд бэлэн байгаагаа илэрхийлсэн.

Иймээс Ерөнхий сайдын захирамжаар Говь-Алтайн Засаг даргыг үүрэгт ажлаас нь чөлөөлж байна. Харин хүн амины хэрэгтэй холбоотой асуудалд хамгийн багадаа 14 хоногийн хугацаа орно гэдгийг Цагдаагийн байгууллагаас мэдэгдсэн. Холбогдох хууль хяналтын байгууллага өөрсдөө мэдээлэл өгөх байх" гэв.

Монгол Улсын Ерөнхий сайд У.Хүрэлсүх өнөөдөр /2020.02.21/ Говь-Алтай аймгийн Засаг дарга Ванчигийн Рэнцэндоржид хариуцлага тооцож, үүрэгт ажлаас нь чөлөөллөө.

В.Рэнцэндорж нь сахилга хариуцлага дэг журмыг чангатгах Засгийн газрын албан даалгавар, төрийн албаны тухай хууль, төрийн албан хаагчийн ёсзүйн дүрмийг ноцтой зөрчиж ажлын байрандаа архи, согтууруулах ундаа хэрэглэсэн нь хуулийн байгууллагын шалгалтаар тогтоогдож, өөрийн биеэр хүлээн зөвшөөрсөн тул Ерөнхий сайд ажлаас нь чөлөөлөх захирамж гаргалаа.

Иймд Говь-Алтай аймгийн Засаг даргыг шинээр томилох хүртэл хугацаанд Монгол Улсын засаг захиргаа, нутаг, дэвсгэрийн нэгж, түүний удирдлагын тухай хуулийн 32.7-д заасны дагуу Говь-Алтай аймгийн засаг даргын бүрэн эрхийг хэрэгжүүлж ажиллахыг Говь-Алтай аймгийн Засаг даргын орлогч Жигжидсүрэнгийн Ганбатад даалгалаа гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй