Гүнжийн хайр
2020-02-26 13:11

Саарал цэргийн өмд, цэнхэр цамц өмсөөд дэгжин зангиа зүүсэн тэрээр Уэльсийн гүнж Дианагийн сэтгэл зүрхийг эзэмдэхээр ажээ. Түүнийг цэнхэр “Рено” тэрэгтэйгээ хайрга шажигнуулсаар Кенсингтоны дотоод хашаа руу Жеймс Хьюит хэмээн нэрээ хэлэх төдийд хамгаалагч цагдаа нар дор нь оруулах нь тэр. Уэльсийн гүнж хайрган дээгүүр тэрэг явахыг сонсоод зочноо тосон шатаар доош гүйнэ. Гүнж, ахмад хоёр харц солилцоод л энэ оройг тэсэн ядан хүлээж байснаа ойлгоно. Сэтгэл түгшээсэн, ээдрээт хайрын түүх ийнхүү эхлэх нь тэр. 

1986 оны зуны сүүлчээр болсон нэгэн хөгжилтэй үдэшлэг дээр Уэльсийн гүнжид ахмад Жэймс Хьюитийг санамсаргүй байдлаар танилцуулж орхижээ. Ахмад Хьюит гүнжийг харангуутаа л сэтгэл алдарсан байна. Гүнж Дианад ч мөн адил сайхан хүмүүжилтэй, өргөн цээжтэй, Гвардийн залуу ноёнтон шууд л таалагджээ. Тэр мөчид гүнж Диана түүнээс морь унаж сургахыг хүссэн бөгөөд Жэймс даруй зөвшөөрсөн аж. Тэр хоёр Жеймсийн ажилладаг Найтсбрижийн хуаранд өглөөгүүр сургуулилж, өдөр нь Гайд цэцэрлэгт хүрээлэнгээр зугаалдаг байлаа. Эхлээд гүнжийг дагалдаж ордны шадар хүүхэн, хэд хэдэн цагдаа, энгийн хувцастай туршуулууд байсан бол удалгүй Диана ганцаараа ирэх болжээ. 

Ахмад Хьюит бол хүч самбаа сорьсон, эр зориг шалгасан ажилдаа дуртай, үнэнч зан чанарыг үнэлдэг цэргийнхний дунд өсч өндийсөн ба хэр хэмжээнд нь тааруулж ууж, идэх дуртай, өөрийгөө үнэлж чаддаг нэгэн байв. Харин Диана бол ямагт өөрийгөө цэгнэж, өдөр бүр шаналж, сэтгэлийн түгшүүртэй амьдралыг туулж яваа хөөрхийлөлтэй гүнж. Хоёр хүүтэй болсон ч нөхөр болох хунтайж Чарльз нь түүнийг хайрлаж, шохоорхож байсан удаа үгүй. Анхнаасаа бүтэхгүй харилцааг эхлүүлсэн нь Эзэн дээдсийн гэр бүл дотор хайр сэтгэлийг хоёрдугаар зэрэгт тавьдагтай холбоотой юм. Хунтайж Чарльз нөхөр сүүдэртэй хатагтай Камилла Паркер-Боулз хоёрыг ойр дотно байдгийг Диана гэрлэхээсээ өмнө мэддэг байсан авч өрсөлдөгч хүүхнээсээ дээгүүр гарч, хунтайжийг өөртөө татаж насан туршдаа хайрлуулна хэмээн итгэж байжээ. Гэтэл бүх зүйл түүний хүссэнээр болохгүйг бал сараа тэмдэглэж явахдаа тэрээр ухаарсан аж. Диана Чарльз руу тэмүүлэх тусам түүнийг өрсөлдөгч хүүхнийхээ өвөр рүү улам бүр түлхэж байв. Диана улам л өөртөө итгэлгүй болж өөрийгөө зүхэх болсон байна. Тэрээр таван жилийн турш хайр сэтгэлийнхээ төлөө ямар ч үр дүнгүй тэмцжээ. Хэдий тийм ч Диана нөхрийгөө хайрладаг хэвээрээ л байлаа. 

Эзэн хааны ордонд Дианаг олон зантай, дэндүү сэтгэлийн хөдөлгөөнтэй, хөөрүү гэж үздэг байсан ба түүний зовж буйг төдий л тоодоггүй байв. Гагцхүү сэтгэлгүй хүнтэй албадлагаар суусан Маргарита гүнж л Дианаг сайн ойлгодог байжээ. Гэтэл хунтайж Чарльз олны дунд байнгын нууц амрагтайгаа үзэгдсэн ч түүнийг чичлэх нэгэн байсангүй. 

Гүнжийн сэтгэл зүрхийг булаасан ахмад Жеймс яг л түүний хүйтэн хөндий нөхрийн бас нэгэн хуулбар мэт байх нь тэр. Түүний уурлаж, гайхсанаа ч мэдэгдэхгүй үгээ зөөж, удаан ярьдаг нь, уурлахдаа тамгатай бөгжөө оролддог нь хүртэл Чарльзтай адилхан санагджээ. Хэдийгээр ахмад Жеймс хунтайж Чарльзын адил ухаалаг, хүйтэн хөндий нэгэн байсан ч түүний хажууд Диана биеэ барьж, айж сандралгүй чөлөөтэй байж чаддаг байлаа. Гүнжийн хувьд ахмад Хьюитт бол дөлгөөн ааштай, өөрт нь хайртай үнэнч нөхөр байлаа. 

Хуаранд өглөө кофе уух бүртээ Диана түүнд хунтайжтай хэрхэн амьдардаг тухайгаа үнэнээр нь ярихад Жеймс гайхаж, сониучирхан сонсдог байлаа. Ингэж тэр хоёрын хайр сэтгэл өрнөж өдөр болгон, заримдаа өдөрт хоёр уулзаж зовлон жаргалаа хуваалцана. Уулзалтыг яг л цэргийн нууц ажиллагаа шиг төлөвлөдөг байсан нь гүнж Дианагийн алдар нэр, мөн түүнийг байнга дагалддаг бие хамгаалагчидтай холбоотой байсан аж. 

Жеймс Дианаг тэнгисийн явган цэргийн ахмад эцэгтэй танилцуулсан ба Диана ч мөн адил Жеймсийг хоёр хүүтэйгээ танилцуулсан нь тэдний харилцаа гүнзгийрснийг илтгэнэ. Таван жилийн турш шаналж тарчилан хоолонд дургүй болсон Диана одоо л нэг хоолонд орох тэнхээтэй болсон юм. 

Хайрлахын сайхныг мэдэрсэн хоёр хүний нүднээс далд хоёулахнаа байх шинэ, шинэ газрыг өөрийн эрхгүй хайдаг болов. Чарльзийг эзгүй хойгуур Дианагийн ордны гадна орших Хайгроудэд уулзаж жаргадаг болжээ. Гүнж хүүхдүүдээ болоод хэдэн дотны найзуудтайгаа тэнд очоод Жеймст тусгай өрөө гаргаж өгнө. Харин Жеймс шөнө дундад гүнжийн унтлагын өрөөнд зочилдог болов. 

Хунтайж Чарльз тэр хоёрын бие биедээ хайртайг мэддэг болов уу? гэсэн сэмхэн сэрдэлт Жеймст төрнө. Хааяахан таарах янз бүрийн тэмцээн дээр Чарльзтай харц тулгарахад цаадах нь ямагт боловсон загнаж, нөхөрсөг ханддаг байсан тул Жеймс улам бүр зориг орж Девоншир гүнлэгт байдаг ээжийнхээ гэрт Дианаг урих нь тэр. Девонширт дурлалт хоёрын хамгийн дурсгалтай мөчүүд хамгийн таагүй мөчүүд ч өрнөсөн аж. Гүнжтэй хоёр жилийг өнгөрөөхдөө гагцхүү түүний үгээр л үг хийдэг байсан ахмад Девонширт байх хугацаандаа өөрийнхөө зүтгэх гэж оролдох нь тэднийг ялимгүй муудалцахад хүргэдэг байжээ. 

1988 оны арван нэгдүгээр сард Жеймс, Чарльз хунтайжийн 40 насны ойд үдэшлэгт уригдсан ч Диана гүнжид анхаарал тавих боломж ер олдсонгүй. Энэ нь ч тэдэнд сайнаар нөлөөлж хавь ойрын хүмүүс тэдний харилцааг таамаглаж үл чаджээ. Харин Диана гүнж өрсөлдөгч хүүхэн Камиллаг нөхрөөсөө холдуулах санаагаа орхиогүй л байсан ба тэр ч байтугай нэгэн зоог дээр түүнийг хунтайжтай ямар холбоотойг сайн мэднэ гээд хэлээд орхиж. Ингээд Дианагийн сэтгэл нь амарсан боловч асуудлыг шийдэх гарц биш байлаа. 

Жеймс, Диана хоёрын харилцаа өрнөсөөр л. Мөн л нуугдаж, гэмгүй царайлах нь төвөгтэй, хэцүү санагдаж, цаашаа хэрхэх нь мэдэгдэхгүй харилцаа үргэлжилж байв. 

1989 онд Германд цэргийн томилолтоор хоёр жил ажиллах болсныг Жеймст мэдэгджээ. Тэрээр хүний газар хайртыгаа үе үе санагалзан албат ажлаа үнэнчээр биелүүлж, ан гөрөө, цанаар гулгах энэ тэрийг хийсээр цагийг өнгөрүүлж байлаа. Хааяахан гүнж түүн рүү утасдах авч хоёуланд нь нэг л гунигтай санагдана. Тэнд байх хугацаандаа Жеймс Дианаг мартахаар шийдэж Герман Бароны эхнэртэй түр зуурын учир ургуулжээ. 

Жеймсийг амралтаараа ирэхэд гүнж түүнийг Хайгроуд дахь байшиндаа урьж өнөөх шаналгаант хайр сэтгэлээ дахин хүчтэй өдөөж орхив. 

Персийн буланд болж байсан дайнд Жеймсийг явсан хойгуур хайр дурлалдаа үнэнч байсан Диана түүндээ уртаас урт захидлуудыг илгээж, тэр ч байтугай Девонширт байсан түүний ээж, дүү хоёрыг эргэн сахиж, эрүүл саруул яваасай гэсэндээ зул асаадаг байжээ. Гэтэл тэдэнд золгүй явдал тохиож, Уэльсийн гүнж ахмад Жеймст захиа илгээдэг байсан тухай хэвлэлийнхэн олж мэдчихэж. Нөгөөтэйгүүр Жеймсийг Герман Бароны эхнэртэй хэрхэн дотно харилцаатай байсан болоод үнэтэй, цайтай бэлэг сэлтийг бие биедээ өгдөг байсан тухай мэдээлэл цацагдаж орхих нь тэр. 

Эл явдлаас болж Жеймс Англидаа эргэж ирсэн бөгөөд шууд Хайгроув руу явсан байна. Диана түүнийг зам дундаас нь тосон авч тэргэндээ нууж, мэдэгдэлгүйгээр сүүлчийн уулзалтаа энхрий дотноор өнгөрүүлжээ. 

Жеймсийн хувьд түүний бүхий л амьдрал нүднийх нь өмнө нуран унаж буй мэт санагдаж байв. Тэрээр Германаас ирээд тушаал дэвшинэ хэмээн бодож байсан боловч энэ бүхэн талаар өнгөрч дээдсийн хүрээлэнтэй нэр холбогдсон нэгэн зүгээр өнгөрөх эрхгүй болсон юм. Тиймээс түүнийг албат үүргээс нь хүчээр чөлөөлсөн байна. 

Диана гүнж болоод ахмад Жеймсийн талаарх нарийн ширийн мэдээллүүдийг хаанаас олсон эсэх нь уншигч эрхэмд сонин байх нь гарцаагүй билээ. Энэ бүхний нууцыг сэтгэлийн хат дутсан ахмад Жеймс Хьюит сэтгүүлчдэд худалдсан байна. Харин сэтгэлийн хөдлөлөөр алдаж эндсэн, өчнөөн жилийг өнчин хайраар элээж ирсэн хөөрхий гүнж буруутан болон үлдсэн нь туйлын гунигтай. Хэдий тийм ч түүний агуу их эр зориг, хайрынхаа төлөө золиослож чадах зовлон гунигийг дийлэх тэнхээ ахмад Жеймст байгаагүйг цаг хугацаа харуулж орхилоо. 

Эх сурвалж: Ил товчоо

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.
  • Их уншсан
  • Их сэтгэгдэлтэй