БНСУ, Японы чиглэлд хийх нислэгийг 3-р сарын 11-ний өдрийг дуустал түр зогсоолоо
2020-02-26 16:29

Улсын Онцгой комисс өнөөдөр хуралдаж, шинэ коронавирус COVID-19-ийн халдвараас урьдчилан сэргийлэх арга хэмжээний талаар зарим шийдвэрийг гаргасан.

УОК-оос гаргасан шийдвэрийг УОК-ийн дарга, Шадар сайд Ө.Энхтүвшин танилцууллаа.  

УОК-ийн дарга, Шадар сайд Ө.Энхтүвшин “Коронавирусийн тархалт дэлхий нийтийг цочроон тархаж байна. БНХАУ-ын дараагаар хамгийн их анхаарал татаж байгаа улс БНСУ байна. Өнөө өглөөний мэдээгээр 1,146 хүн халдвар авсан. 11 хүн нас барсан. 25-ны өдрийн 17:00 цагаас хойш халдвар авсан хүний тоо 169-өөр нэмэгджээ. Хэдийгээр Монгол Улсад коронавирусийн халдвар авсан хүн тогтоогдоогүй ч тайвшрах зүйл огтхон ч алга гэж үзэж байгаа.

Үүнтэй холбоотойгоор УОК-ийн хурлаас дараах шийдвэрүүдийг гаргасан.

Нэгдүгээрт, улс хот хоорондын зорчигч тээвэр, суудлын галт тэрэг, орон нутгийн хуваарьт нислэг, хувийн тээврийн хэрэгслийн зорчих хөдөлгөөнийг түр зогсоох хугацааг хоёрдугаар сарын 27-ны өдрийн 08:00 цагаас гуравдугаар сарын 3-ны 08:00 цаг хүртэл сунгаж холбогдох зохион байгуулалтын аргa хэмжээ авахыг ЗТХ-ийн сайд Б.Энх-Амгалан, аймаг, нийслэлийн Засаг дарга нарт даaлгаж байна.

Монгол Улс, БНСУ-ын хоорондын хоёр талын нислэгийг түр зогсоосон хугацааг хоёрдугаар сарын 27-ноос гуравдугаар сарын 11-ны өдрийг дуустал сунгах, Монгол Улс, Япон Улс хоорондын нислэгийг хоёрдугаар сарын 28-наас гуравдугаар сарын 11-ний өдрийг дуустал түр зогсоохыг ЗТХ-ийн сайдад даалгаж байна.

Төрийн албан хаагчдыг гадаад орон руу албан томилолтоор зорчихыг хоёрдугаар сарын 27-ноос гуравдугаар сарын 30-ны өдөр дуустал зогсоох арга хэмжээ авахыг холбогдох агентлаг, аймаг, нийслэлийн Засаг дарга нарт үүрэг болгож байна.

БНСУ-ын болон тус улсаар дамжин ирж байгаа зорчигчдыг хоёрдугаар 27-ноос гуравдугаар сарын 30-ны өдрийг дуустал нэвтрүүлэхгүй байхыг ГХ-ийн сайд, ГИХГ-т даалгалаа.  

Коронавирусийн талаар санаатай болон санамсаргүйгээр худал ташаа мэдээлэл түгээсэн, өвчний голомт бүртгэгдсэн улсаас ирсэн аяллын түүх, эрүүл мэндийн байдлаа хуурамчаар мэдээлсэн, мэдээлэл өгөхөөс татгалзсан, төрийн болон мэргэжлийн байгууллагын шийдвэрийг хэрэгжүүлэхээс татгалзсан, хууль ёсны шийдвэр, шаардлагыг биелүүлээгүй иргэн албан байгууллага, хуулийн этгээдэд холбогдох хууль тогтоомжийн дагуу хариуцлага тооцож ажиллахыг ЦЕГ-ын дарга, ТЕГ-ын дарга, аймаг, нийслэлийн Засаг дарга нарт үүрэг өгч байна.

БНСУ-д байгаа иргэд бусад маршрутаар буюу Турк, ОХУ-аар дамжиж ирж байгаа тохиолдолд тэдгээр иргэдийг заавал 14 хоног тусгаарлалтад байлгах шийдвэр гаргалаа” гэв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй