Анхаарал болгоомжгүй хийсэн ухрах үйлдлүүдийн улмаас гурван хүний амь нас хохирчээ
2020-02-27 11:04

Тээврийн цагдаагийн албаны Жижүүрийн шуурхай удирдлагын хэлтэс энэ сарын 23-наас 27-ны өдрүүдэд нийт 527 дуудлага, мэдээлэл хүлээн авснаас 323 зам тээврийн ослын шинжтэй дуудлага бүртгэгдсэн байна.

Бүртгэгдсэн зам тээврийн ослын улмаас 7 хүн гэмтэж, ноцтой зам тээврийн ослын улмаас орон нутагт 6, нийслэлд 2  хүний амь нас хохирсон байна. 

Нийт нас барсан, гэмтсэн ослыг хэлбэрээр нь авч үзвэл

Явган зорчигч мөргөх хэлбэрээр - 4
Онхолдож - 2
Мөргөлдөх - 1
Үл хөдлөх зүйл мөргөх хэлбэрээр 1 тус тус бүртгэгдсэн байна.

Хоёрдугаар сарын 23-ны 12:00 цагийн орчимд Дорнод аймагт  MMC-L200 маркийн автомашины жолооч Э нь ухрах үйлдэл хийхдээ явган зорчигч 2 настай эмэгтэй Н-ийн амь насыг хохироосон, хоёрдугаар сарын 25-ны 20:00 цагийн орчимд Дорнод аймгийн Баян-Уул суманд KIA Fronteir маркийн автомашины жолооч З нь мөн ухрах үйлдэл хийхдээ явган зорчигч эрэгтэй 5 настай М-ийг дайрч амь насыг нь хохироосон харамсалтай хэргүүд гарсан байна.

Шинийн гуравын /02.26/ өглөөний 08:10 цагийн орчим Сүхбаатар аймгийн Эрдэнэцагаан сумын 3-р багийн нутагт Нyundai Porter маркийн автомашин ухрах үйлдэл хийх үедээ явган зорчигч 45 настай эрэгтэй О-ийн амь нас хохирсон харамсалтай хэргүүдийг тус тус шалгаж байна.

Жолооч нар замын хөдөлгөөнд оролцож, ухрах үйлдэл хийхдээ толинд харахдаа анзаараггүй байх, ард хүн байгаа, хүүхэд явж байгаа эсэхийг сайтар хянаж байхыг анхааруулж байна...

Энэ сарын 23-ний 11:00 цагийн орчимд Өвөрхангай аймгийн Өлзийт сумын 1-р багын нутаг “Баянхошуу” гэх газар Toyota Prius 10  маркийн автомашин онхолдож жолооч 22 настай М-ийн амь нас хохирсон.

Мөн өдрийн 15:00 цагийн орчимд Хөвсгөл аймгийн Тосонцэнгэл сумын 2-р багын нутаг “Баянголын ам” гэх газар мотоцикл замын хажуугийн шон мөргөж жолооч 49 настай Д-ийн амь нас хохирсон байна.

Хоёрдугаар сарын 26-ны 17:00 цагийн Дорноговь аймгийн Улаанбадрах сумын 2-р багт Г жолоочтой Хаужи маркийн улсын дугааргүй мотоцикл онхолдож, зорчигч 11 настай эрэгтэй Э-ийн амь нас хохирч, зорчигч 12 настай эрэгтэй Г гэмтсэн.

Хоёрдугаар сарын 24-ний 21.10 цагийн орчимд Баянгол дүүргийн аравдугаар хорооны нутаг дэвсгэр Зүүн Нарангийн гудамжинд улсын дугаар тодорхойгүй марк автомашины жолооч нь явган зорчигч 41 настай, эрэгтэй О-г мөргөж, гэмтээн, хэргийн газрыг орхин явжээ. Улмаар явган зорчигч О нь ГССҮТ-д хэвтэн эмчлэгдэж байгаад нас барсан аж. Тээврийн цагдаагийн алба хаагчид шуурхай ажилласны үр дүнд хэргийг газрыг орхиж явсан жолоочийг олж тогтоосон байна. 

Хоёрдугаар сарын 25-ны 14.32 цагийн орчимд СХД-ийн 11-р хороо, Хонхорын гудамжинд Jeep Wrangler маркийн автомашин онхолдож, зорчигч эрэгтэй, 28 настай Б нь ГССҮТ-д хүргэгдэн очоод нас барсан харамсалтай ослууд баярын өдрүүдээр гарсан байна. 

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 56 жолоочийг илрүүлж, хуулийн дагуу хариуцлага тооцсон байна. Согтуугаар тээврийн хэрэгсэл жолоодож зам тээврийн осол гаргасан 5 зөрчил Тээврийн цагдаагийн албанд бүртгэгдсэн байна.

Өнгөрсөн жилийн Сар шинийн баярын өдрүүдтэй харьцуулахад нийт дуудлага мэдээлэл 72.3 хувиар, бүртгэгдсэн зам тээврийн осол, хэрэг 33.9  хувиар, хүний амь нас хохирсон осол, хэрэг 38.4 хувиар,  гэмтсэн хүн 92.1 хувиар тус тус  буурсан үзүүлэлттэй байна. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй