Хилс хэргээр 23 жил шоронд суужээ
2020-03-05 09:11

АНУ-ын Канзас мужийн гэм буруугүй иргэн хилс хэргээр 23 жил шоронд суусны эцэст цагаатгагдан их хэмжээний нөхөн төлбөр авчээ.

17 настай Ламонт Макинтайр (Lamonte McIntyre) хоёр хүнийг егүүтгэсэн гэх хилс хэргээр шийтгэгдэн өргөст торны цаана 8,5 мянган өдрийг өнгөрүүлсэн байна. 2017 оны аравдугаар сард Уайандот дүүргийн шүүх хэргийг дахин хянан хэлэлцээд Ламонтийг цагаатгажээ.

43 настай Макинтайр хилс хэргээр яллагдан шоронд олон жил сууж, сэтгэл санаа, эрүүл мэндээр хохирсныхоо нөхөн төлбөрийг нэхэмжилж Канзас мужийг 2019 онд шүүхэд өгчээ.

2020 оны хоёрдугаар сарын 24-нд Ерөнхий прокурорын газраас хохирогч Ламонт Макинтайр-д 1,5 сая ам.доллар (4 тэрбум 144 сая төгрөг)-ын нөхөн төлбөрийг олгох шийдвэрийг гаргасан байна. Мөн түүнд цагаатгасан тухай гэрчилгээ болон эрүүл мэндийн үнэгүй үзлэг эмчилгээний улсын хөтөлбөрт 2020, 2021 онд хамрагдах эрхийг олгохоор болжээ.

“Канзас муж миний амьдралын 23 жилийг авчихаад юу ч эргүүлэн өгөөгүй. Энэ муж миний залуу насыг авсан. Гэр бүлтэйгээ тэмдэглэн өнгөрүүлэх байсан миний төрсөн өдрүүдийг, Зул сарын баярыг надаас хулгайлсан. Мөн гэр бүлд маань хүнд хэцүү үе тохиолдож, миний туслалцаа, дэмжлэг хэрэг болоход би тэднийхээ дэргэд байж чадаагүй” хэмээн Ламонт өгүүлэв.

Цагаатгагдан наранд гарсан хойноо хохирогч эр “Гэм буруугүйн гайхамшиг” ТББ байгуулан өөртэйгээ ижил хэлмэгдэж хохирсон хүмүүст тусалж байгаа гэнэ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

  • Их уншсан
  • Их сэтгэгдэлтэй