Т.Бадрал: Энэ цаг үеэс эхлэн гадаадын иргэдийг хүлээж авахгүй
2020-03-16 14:20

Улсын онцгой комиссын шуурхай штабаас цаг үеийн асуудлаар мэдээлэл хийлээ.

Энэ үеэр ОБЕГ-ын дарга Т.Бадрал "Шуурхай штаб дээр ажиллаж буй баг төлөвлөгөөний дагуу ажилласаар байна. Гадаадад байгаа монголчуудаа эх орондоо хүлээн авах ажил үргэлжлэн явж байна. Өнөөдөр нэг онгоц бууна. 18-нд Туркийн Стамбулаас дараагийн нэг онгоцыг хүлээж авна.

Одоо нөхцөл байдал их ярвигтай цаг үед ирж байх шиг байна. Өөрөөр хэлбэл өвчилсөн хүний тоо дэлхий даяар 150 мянга гараад явчихлаа. Амь насаа алдсан хүний тоо 6500-гаас дээшээ гараад явчихлаа. Өвчний халдвар бүртгэгдсэн улсын тоо 150 болчихлоо. Европ тив том голомт болсныг ДЭМБ-аас албан ёсоор зарласан, тус тивд нөхцөл байдал маш хүнд байна. Испанид л гэхэд 46 сая хүн гэрийн хорионд орсон байна.

АНУ Европоос гадаадын иргэдийг авахгүйгээс гадна өөрсдийнхөө иргэдийг авахгүй гэдгээ зарласан байсан. Ингээд ганцхан Их Британи, Ирландаас авна гэж тооцож байсан боловч өчигдрөөс албан ёсоор шийдвэрээ гаргаад энэ хоёр улсаас бас онгоц хүлээн авахгүй болж байх шиг байна. 

Гэх зэргээр гадаадын улс орнууд хариу арга хэмжээнийхээ ажлуудыг хийгээд ажиллаж байна.  

Монгол Улсын хувьд нөхцөл байдал ямар байгааг та бүхэн мэдэж байгаа. Ийм учраас цаашид бид олон удаа онгоц хүлээж авахад их төвөгтэй болж байна. Сая Берлин-Москвагаас ирсэн хүмүүсийн дунд тодорхой шинж тэмдэгтэй хүмүүс ирж ХӨСҮТ-д тусгаарлагдаж байна. 

Гэх зэргээр маш том эрсдлүүд Европ талаасаа байгаа учраас энэ цаг үеэс эхлээд ямар ч гадаад улсын иргэдийг хүлээж авахгүй гэх шийдвэрийг албан ёсоор гаргаж байгаа гэдгийг хэлье. Зөвхөн ОХУ-аас орж ирж байгаа хүнсний тээвэртэй холбоотой орж ирж байгаа тээврийн жолооч нарыг оруулах асуудал чөлөөтэй үргэлжлэх байх.

Цаашид олон нислэг хүлээж авах нь эрсдлийг дагуулж буй учраас магадгүй тодорхой хугацааны дараа энэ хөдөлгөөнийг хязгаарлахаас өөр аргагүй байдалд орно" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй