Батлагдсан тохиолдлуудтай хамт нэг онгоцоор ирсэн 75 хүний шинжилгээнд коронавирус илрээгүй
2020-03-20 11:59

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "2020 оны гуравдугаар сарын 17-нд Берлин-Москва-Улаанбаатар чиглэлийн тусгай нислэгээр ирсэн батлагдсан тохиолдлуудын хавьтал болох 75 хүний шинжилгээнд коронавирус илрээгүй. Мөн 156 хүний шинжилгээ үргэлжлэн хийгдэж байна.

Истанбул-Улаанбаатар чиглэлийн тусгай нислэгээр ирж ХӨСҮТ-д тусгаарлагдсан 24 хүний шинжилгээнд коронавирус илрээгүй.

Ер нь бид тусгай үүргийн онгоцоор ирсэн бүх хүмүүсийг дэс дараатай шинж тэмдгийг нь хянаж, шинжилгээнд хамруулах төлөвлөгөөтэй ажиллаж байгаа.

Гуравдугаар сарын 18-нд Сэлэнгэ аймагт тусгаарлагдсан гурван тохиолдлын шинжилгээнд коронавирус илрээгүй.

Гуравдугаар сарын 19-нд Хэнтий аймагт нэг сэжигтэй тохиолдол тусгаарлагдсан. Тандалт судалгаа хийгдэж байгаа бөгөөд сорьц наашаа гарсан. Хавьтал болох автобусанд байсан 24 хүнийг шинжилгээний хариу гартал тусгаарласан. Энэ иргэн Дорнод аймгийн Хавиргын боомтоор орж ирсэн тухайн үед шинэ тэмдэг илэрсэн учраас тусгаарлаж хяналтад оруулсан" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй