Д.Нямхүү: Түүврийн аргаар 28 хүнээс шинжилгээ авснаас коронавирус илрээгүй
2020-03-25 12:11

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Гуравдугаар сарын 23-нд нийслэлийн зургаан дүүргийн эмнэлгүүдээс санамсаргүй түүврийн аргаар 28 хүнээс шинжилгээ авснаас коронавирус илрээгүй. Урьд нь би хэлж танилцуулж байсан, эмнэлэгт хэвтэж байгаа уушгины хатгаагаар өвдсөн хүмүүсийн дотор коронавирус байна уу гэж эрэн хайж, хянаж байгаа тандалт судалгаа юм.

Гуравдугаар сарын 23-нд Алтанбулагийн боомтоор орж ирээд Сэлэнгэ аймагт тусгаарлагдсан хоёр, Орхон аймагт тусгаарлагдсан нэг, нийт гурван тохиолдлын шинжилгээнээс коронавирус илрээгүй. 

Өнөөдрийн байдлаар ХӨСҮТ-д 186 хүн тандалт хяналтад байна.

Тусгай нислэгээр хүмүүсээ бүгдийг хянаж, тандаж, шинжилгээ авах, шинжилгээг давтан авах ажлыг зохион байгуулан ажиллаж байна. 

Өвчтөнүүдийн биеийн байдал тогтвортой байна. ДЭМБ-аас гаргасан зөвлөмж, стандартын дагуу таван сорьцонд лабораторийн шинжилгээг хийж байгаа. Хамар, залгиураас арчдас авч хийж байгаа. Мөн цэрэнд хийж байна. Энэ нь уушгинд вирусийн хэмжээ өсч үржиж байгаа эсэхийг хянахад хэрэгтэй байдаг. Бас цус буюу ийлдсэнд хийж байна. Мөн ялгадсанд хийж байгаа.

Эмчилгээнд байгаа өвчтөнүүдийн лабораторийн шинжилгээг өдөр бүр хийж, хянаж, протокол хөтөлж тэмдэглэж байна. Энэ нь эмчилгээний үр дүн ямар байгааг харьцуулан үзэх ач холбогдолтой юм. 

Мөн эмчилгээ хийгдэж бүрэн эдгэрсэн хүнийг гаргахдаа гурван өдөр дараалан шинжилгээ авч вирусийн шинжилгээ хийж баталгаажуулаад гаргах дүрэм журмийг дагаж ажиллана" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй