“Маск их хэмжээгээр нийлүүлнэ” гэсэн зарын дагуу их хэмжээний мөнгөө залилуулжээ
2020-03-25 12:50

Эрүүл мэндийн яамнаас коронавирусийн халдвартай холбоотой ээлжит мэдээллээ танилцуулах үеэр ЦЕГ-ын Урьдчилсан сэргийлэх хэлтсийн ахлах мэргэжилтэн, цагдаагийн дэд хурандаа Д.Бүрэнбаатар гарч буй залилангийн гэмт хэргийн талаарх мэдээлэл хийж, иргэдийг анхаарал сэрэмжтэй байхыг санууллаа.

"Коронавирустэй холбоотой дэлхийд үүсээд буй нөхцөл байдалтай холбоотойгоор сүүлийн үед  цахим залилангийн гэмт хэрэг их гарч байна. 

Улс орнуудад цахим хуудас, интернет худалдааны платформууд болон олон нийтийн сүлжээ, электрон шуудангийн хаяг, амны хаалт үйлдвэрлэдэг нэр хүндтэй компаниудын нэрийг ашиглан улс дамжин залилах гэмт хэрэг үйлдэгдэж байна.

Мөн коронавирустай тэмцэж буй төрийн байгууллагууд, алба хаагчдад болон хүнд өвчтэй хүнд хандив цуглуулах нэрийдлээр хуурамч хаяг нээн, кампанит ажил өрнүүлэх, иргэдийг залилах явдал гарч болзошгүй болчихоод байна.

Иймд иргэд бодит бус мэдээлэлд итгэж, нягтлаагүй мэдээллээ бусадтайгаа хуваалцах, бусдад зөвлөгөө өгөх зэргээс болж бусдад залилуулж байгааг анхаараарай.

Коронавирустэй холбоотойгоор бусдад залилуулсан, хуурамч мэдээ мэдээлэл тараасан нийт 25 дуудлага мэдээллийг мөрдөн шалгаж байна.

Тухайлбал, БНХАУ-ын Эрээн хотод амьдардаг Монгол Улсын иргэн Д гэгч нь “маск их хэмжээгээр нийлүүлнэ” гэж иргэн Б-д санал болгож 8,400,000 төгрөгийг залилж авсан. 

Мөн цахим худалдаагаар маск худалдана гэсэн зарын дагуу Монгол Улсын иргэд ХБНГУ руу 117 сая төгрөг урьдчилаад шилжүүлж залилуулсан гэмт хэргүүд бүртгэгдээд шалгагдаж байна.

Иймд иргэд та бүхэн сэрэмжтэй байж, дараах мэдээллийг сайтар нягтлан шалгаж, өөрийгөө болон бусдыг эрсдлээс урьдчилан сэргийлээрэй гэж цагдаагийн байгууллагаас уриалж сануулж байна.

Үүнд:

- Хуурамч цахим хуудас, интернет худалдааны платформууд, олон нийтийн сүлжээ, электрон шуудангийн хаяг ашиглан амны хаалт /маск/, ариутгагч, эм бэлдмэл, нэг удаагийн хамгаалалтын хувцас зэргийн борлуулалт, хүргэлтийн үйлчилгээ үзүүлдэг компаниудын нэр хүндийг ашиглан та бүхнийг залилж болзошгүй байна.

- ДЭМБ, олон улсын байгууллагаас коронавирусаас урьдчилан сэргийлэх заавар, зөвлөмж өгч буй мэтээр фишинг цахим холбоосуудыг олон нийтийн сүлжээнд байршуулж иргэдийн хэрэглэгчийн нэр, нууц үгийг авч таны компьютер, гар утас дээрх файлуудыг зөөх, шилжүүлэх, банкны шилжүүлэг хийх.

- Коронавирус /COVID-19/-ээс урьдчилан сэргийлэх, тэмцэх чиглэлээр ажиллаж байгаа төрийн байгууллага, алба хаагчдад туслах, хүнд өвчин туссан хүүхэд, өвчтэй болон гамшиг, осолд өртсөн хүмүүсийн зураг тавьж тэдэнд туслах зорилгоор хандив цуглуулж байна гэж итгүүлэн, хуурамч хаяг нээн кампанит ажил өрнүүлж иргэдийг залилах.

Тийм учраас ямар нэгэн байдлаар бэлэн мөнгийг бусдын данс руу урьдчилж шилжүүлэхгүй байх. “Бүү сандар, бүү хуурт, бүү өг” гэсэн уриатайгаар энэ цаг үеийг даван туулахыг Та бүхэндээ уриалж байна" гэлээ. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй