Д.Нямхүү: Истанбул-Улаанбаатарын онгоцоор ирсэн нэг сэжигтэй тохиолдлын давтан шинжилгээнд коронавирус илэрлээ
2020-03-28 11:54

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Токио-Улаанбаатарын чиглэлийн тусгай нислэгээр ирсэн 100 хүний шинжилгээнд коронавирус илрээгүй. Ингээд Токио-Улаанбаатарын онгоцоор ирсэн 206 хүнийг шинжилж, хянаж дуусгалаа.

Тусгай үүргийн дөрвөн онгоцоор ирсэн тусгаарлалт, ажиглалтад байгаа бүх хүмүүсийг шинжилж дууслаа. Гэхдээ ажиглалтын хугацаанд шаардлагатай үед дахин шинжилгээ хийж хянана. Ажиглалт тусгаарлалтын үед эмч нар анхаарал сулруулахгүй хянана, иргэд ч өөрсдийгөө маш сайн хянаж, өөртөө анхаарал тавьж, эмч нарын өгсөн үүрэг, даалгавар зөвлөгөөг 21 хоногийн хугацаанд маш сайн дагаж гүйцэтгэх хэрэгтэй.

Истанбул-Улаанбаатарын чиглэлийн тусгай нислэгээр ирсэн нэг сэжигтэй тохиолдлын давтан шинжилгээнд коронавирус илэрлээ. Ингэснээр батлагдсан тохиолдол 12 боллоо. Тандалт судалгаа, эмчилгээ, шинжилгээ үргэлжлэн хийгдэж байна.

Гуравдугаар сарын 26-нд ХӨСҮТ-д тусгаарлагдсан хоёр, Сэлэнгэ аймагт тусгаарлагдсан хоёр, Дархан-Уул аймагт тусгаарлагдсан хоёр, нийт зургаан хүний шинжилгээнд коронавирус илрээгүй. 

Гуравдугаар сарын 27-нд Сэлэнгэ аймагт таван сэжигтэй тохиолдол тусгаарлагдаж, тандалт судалгаа, шинжилгээ хийгдэж байна.

Өнөөдрийн байдлаар ХӨСҮТ-д 220 хүн байна" гэлээ.

 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй