Д.Цогтбаатар: Иргэдээ татан авахаар болбол хангалттай хугацаа өгч зарлана
2020-04-14 15:44

Өнөөдөр /2020.04.14/ Улсын онцгой комиссын ээлжит хуралдаан болж, дараах шийдвэрүүдийг гаргажээ.

Гадаад харилцааны сайд Д.Цогтбаатар "УОК-ын хурлаар Эрээнд байгаа манай 50 иргэний тухай асуудлыг ярилцлаа. Эдгээр иргэн гуравдугаар сарын 25-наас Монгол Улсад ирэх өргөдлөө гаргаад хүлээж байгаа. Энэ хугацаанд дөрөвдүгээр сарын 10-нд Өвөрмонголын өөртөө засах орны Онцгой комисс манай иргэдийг хилээр нэвтрүүлэх шийдвэр гаргасан. Энэ хугацаанд бид судлаад, иргэдтэй холбогдоод өнөөдөр УОК-т асуудлыг оруулаад маргааш өглөө 50 иргэнээ Эрээн-Замын-Үүд боомтоор татаж авах шийдвэр гарлаа. 

Нийт 50 иргэнээс 26 нь эмэгтэй, 24 эрэгтэй, 0-5 насны 4 хүүхэд, 5-18 насны гурван хүүхэд, 18-30 насны 17 хүн, 35-45 насны 18 хүн, 50-аас дээш насны 6 хүн, өндөр настан хоёр хүн байгаа. 

Бас нэг асуудал бол гадаадад байгаа иргэддээ ямар нэг хэмжээгээр туслах талаар нэлээд судалж ярьж байна. Манай яам саналаа танилцууллаа. УОК-ын даргаас өгсөн үүргийн дагуу бид саналаа боловсруулж танилцуулсан. Одоо Сангийн яам, Хөдөлмөрийн яамтай хамтраад энэ саналаа нарийвчилж боловсруулаад УОК-т танилцуулахаар болж байна.

Өнөөдрийн байдлаар 7,888 иргэн эх орондоо ирэх хүсэлтээ гаргаад байна. Үүнтэй холбоотой бид эрсдлээ маш нарийн тооцож байна. Ямар тохиолдолд татан авах вэ гэхээр улс орны аюулгүй байдал, эрүүл ахуйн орчноо нэгдүгээрт бодно. Тэр нь юу гэсэн үг вэ гэхээр, тусгаарлах байруудын боломж бололцоо, өрөөнүүд хир суларч байна, эмнэлэгт хэвтсэн хүмүүс маань хэр эдгэрч, сайжирч байна, энэ бүгдийг тооцож байж, дараагийн нислэгүүдийн хуваарь гаргана. 

Ер нь бид иргэдээ бид орхихгүй. Боломжоороо, чадлаараа, нислэг хийдэг цэгүүдээсээ авах бодлого барина. Тодорхой хугацааг өнөөдрийн нөхцөл байдалд хэлэх боломжгүй.

Гадаад улсад халдвар авсан Монгол Улсын нийт 9 иргэн байгаа. Тухайн газрын ЭСЯ-д холбоотой байгаа ихэнхтэй нь. Зарим нь өөрсдөө мэдээллээ нууцалж байгаа, тухайн оронд хүний эрхийн асуудал учраас. Ерөнхий биеийн байдал тогтвортой байгаа.

Иргэдээ татан авахаар болбол хангалттай хугацаа өгч зарлана. Өөр орноос транзитаар ирэх боломжийг нь иргэддээ хангаж өгнө. Тухайн үедээ УОК шийднэ" гэлээ. 

Боловсрол, соёл, шинжлэх ухаан, спортын сайд Ё.Баатарбилэг "УОК-ын хуралдаанд манай яамнаас хичээл сургалтын үйл ажиллагаатай холбоотой асуудлаа орууллаа.

Дөрөвдүгээр сарын 12-ны байдлаар ЮНЕСКО-ийн гишүүн 192 орон үндэснийхээ хэмжээнд хичээл сургалтын үйл ажиллагаагаа бүрэн зогсоосон, хөл хорио тогтоосон байна. Нэг тэрбум 576 сая хүүхэд, багачууд хамрагдсан байна. Хэсэгчлэн хаасан орнуудад 140 сая хүүхэд гээд нийт дэлхийн хэмжээнд 192 орны 1 тэрбум 717 сая хүүхэд, залуучууд хөл хорионд ороод байна.

Бүх шатны боловсролын байгууллагын танхимын хичээл сургалтын үйл ажиллагааг есдүгээр сарын 1-нийг хүртэл зогсоохоор шийдвэрлэлээ. Зургаадугаар сарын 1-нийг хүртэл теле хичээл үргэлжилнэ. 

Улсын болон анги дэвших шалгалтын дүнг сурагчдын хоёрдугаар улирлын дүнгээр тооцож, анги дэвшүүлнэ.

Элсэлтийн ерөнхий шалгалтын хугацаа, хуваарьт одоогийн байдлаар өөрчлөлт ороогүй. ЭЕШ-ыг долоодугаар сарын 2-ноос 5-ны хооронд зохион байгуулах бөгөөд их, дээд сургуулиуд элсэлтээ долоодугаар сарын 8-9-ний өдрүүдэд цахимаар явуулна. Гэхдээ одоогийн байдлаар гэдгийг тодотгож байна.

Есдүгээр анги төгсөж байгаа хүүхдүүдэд улаан шугам тавихгүй. Сурагчид мэргэжлийн сургуульд элсэх болон аравдугаар ангидаа дэвшин орох шийдвэрийг өөрөө гаргана" гэлээ. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй