Эх орондоо ирэх хүсэлт гаргасан, хүндэтгэн үзэх шалтгаантай иргэн бүрт сар бүр $500 олгох саналыг АН гаргалаа
2020-04-15 12:41

УИХ дахь АН-ын зөвлөлийн гишүүд гадаадад хүнд нөхцөлд байгаа иргэдийн эрхийг хамгаалах тухай УИХ-ын тогтоолын төслийг өргөн барих гэж байгаа талаараа өнөөдөр /2020.04.15/ мэдээлэл хийлээ.

УИХ-ын гишүүн, АН-ын дарга С.Эрдэнэ "Өнөөдөр улс оронд үүсээд байгаа цар тахлыг хязгаарлах, цар тахалтай холбоотой аливаа асуудал дээр нийгэм, эдийн засгийн үр дүнтэй, байгаа оносон төрийн бодлогыг боловсруулах шаардлага зүй ёсоор тавигдаж байгаа. 

Сүүлийн үед цар тахлын хамрах хүрээ тэлэх хандлагатай байгаа энэ цаг үед төрөөс авах арга хэмжээний талаар оновчтой бодлогуудыг явуулах зайлшгүй шаардлага үүсч байна.

Зөвхөн цар тахалтай холбоотой асуудал төдийгүй, үүсч байгаа нийгэм, эдийн засгийн хүндрэлүүдийг даван туулахад төрөөс, Засгийн газраас ямар бодлого хэрэгжүүлж, ажлын байраа яаж хадгалах уу, иргэдийн амьжиргааны түвшинг яаж тогтвортой түвшинд барих уу гээд авах арга хэмжээ чухал болоод байна. Тийм учраас АН-аас УИХ-д байгаа гишүүд хамтраад УИХ-ын тогтоолын төслийг боловсруулж өргөн барихад бэлэн болсон. Тов тогтоолгох хүсэлтээ өчигдөр өгчихсөн байгаа. 

АН-аас коронавирус буюу цар тахалтай холбоотой дөрөв дэх тогтоолын төсөл, саналаа УИХ, Засгийн газарт хүргүүлж байна. Удаа дараагийн хүргүүлсэн санал санаачлага, хуулийн төслүүдийг эрх баригчид үл ойшоосон байдалтай хандаж хайхрахгүй байгаа" гэв. 

АН-ын зүгээс энэ удаад гадаад улсад байгаа монгол иргэдийн эрхийг хамгаалах тухай УИХ-ын тогтоолын төслийг боловсруулан, өргөн барих гэж байгаа юм байна. Уг тогтоолын төсөлд цар тахлын улмаас гадаад улсад хөл хорио болон олон улсын нислэгийг зогсоосны улмаас хүнд нөхцөлд байгаа Монгол Улсын иргэдийн эрхийг хамгаалах үүднээс эх орондоо ирэх хүсэлтэй, хүндэтгэн үзэх шалтгаантай Монгол Улсын иргэн бүрт агаарын хил нээгдэж, эх орондоо ирэх хүртэл нь сар бүр $500 санхүүгийн дэмжлэг үзүүлэх зэрэг арга хэмжээг тусгажээ.

Гадаад улсад хүнд нөхцөл байгаа Монгол Улсын иргэдийн эрхийг хамгаалах тухай УИХ-ын тогтоолын төсөл 

Монгол Улсын Их Хурлын тухай хуулийн 43-р зүйлийн 43.1 дэх хэсгийг үндэслэн Монгол Улсын Их Хурлаас тогтоох нь:

1. Коронавирус цар тахлын улмаас  гадаад улсад хөл хорио болон олон улсын нислэг түр зогсоосонтой холбогдуулан хүнд нөхцөлд орсон Монгол Улсын иргэдийн эрхийг хамгаалах үүднээс дараах арга хэмжээг авч хэрэгжүүлэхийг Монгол Улсын Засгийн газар /У.Хүрэлсүх/-т даалгасугай:

        1. Эх орондоо ирэх хүсэлт гаргасан, хүндэтгэн үзэх шалтгаантай Монгол улсын иргэн бүрд байр хоолны наад захын хэрэглээг хангахад зориулж 2020 оны 4 дүгээр сарын 1-ний өдрөөс эхлэн агаарын хил нээгдэж эх орондоо ирэх боломж нээгдэх хүртэл сар бүр 500 ам.долларын санхүүгийн дэмжлэг үзүүлэх,

         2. Монгол Улсын иргэний эрхийг хамгаалах түр журам боловсруулж хэрэгжүүлэх, 

       3. Монгол Улсаас гадаад улсад суугаа элчин сайд, консулын газрыг тухайн улсад хүнд нөхцөлд байгаа өвчтэй, хөгжлийн бэрхшээлтэй, жирэмсэн, өндөр настай, хүүхэд, оюутнууд, санхүүгийн бэрхшээлд орсон зэрэг хүндэтгэн үзэх шалтгаантай Монгол Улсын иргэнийг бүртгэх ажлыг зохион байгуулах,  

2. Энэ тогтоолын хэрэгжилтэд хяналт тавьж ажиллахыг Монгол Улсын Их Хурлын Хууль зүйн байнгын хороо /Х.Нямбаатар/, энэ тогтоолын хэрэгжилтийн талаар Улсын Их хуралд танилцуулахыг Монгол Улсын Засгийн газар /У.Хүрэлсүх/ нарт тус тус даалгасугай.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй