Барын баримлаас айж баларчээ
2020-05-04 09:42

Их Британийн Кент гүнлэгийн цагдаагийн алба хаагчид ойн захаас алдагдсан барыг барих гэж нисдэг тэрэг хүртэл дайчилж сүрийг үзүүлсэн ч харамсалтай нь баримал баранд бяраа үзүүлэх дөхсөн байна.

Андерривер тосгоны ойролцоохь ойд муурын төрлийн араатан байгаа тухай мэдээлэл цагдаагийн газарт иржээ. Түгшүүрийн дохиогоор цагдаа нар хэргийн газарт нисдэг тэрэг хөлөглөн очтол баримлыг барьсан 85 настай Жульет Симпсон тэднийг тоссон байна.

“Би тэднийг барынхаа баримал руу дагуулан очтол тэд элгээ хөштөл инээлдэж, зөндөө их зураг дарсан шүү” хэмээн өндөр настан өгүүлэв.

Хэн нэгэн зүрх муутай этгээд ойн захад жинхэнэ амьд бар байгаа тухай цагдаагийн газарт мэдээлснийг хатагтайд хөршүүд хэлжээ. Жульет ч дуулсан даруйдаа гэрээс нь холгүй орших баримал руу яаран очиж “шүдээ хүртэл” зэвсэглэсэн цагдаа нарыг тосон очиж бараа “хамгаалсан” аж.

Олон жилийн өмнө бүтээсэн энэхүү баримал ойн захад байршаад 20 гаруй жил болж байгаа ч анх удаагаа л “хэрэг тарьж” байгаа нь энэ гэнэ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй