Д.Нямхүү: Алтанбулагийн боомтоор орж ирсэн 37 хүнээс коронавирус илэрлээ
2020-05-16 11:34

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Тавдугаар сарын 15-нд ХӨСҮТ-ийн вирус судлалын хоёр лаборатори, Дархан-Уул аймгийн салбар лабораторид нийтдээ 238 хүнд шинжилгээ хийлээ.

Задалж хэлбэл, тандалтын зорилгоор Баян-Өлгий, Өвөрхангай, Дундговь аймаг болон Баянзүрх дүүргийн нэгдсэн эмнэлгээс цуглуулсан 15 сорьцонд коронавирус илрээгүй.

Дархан-Уул аймгийн вирусологийн салбар лабораторид Алтанбулагийн боомтоор орж ирсэн 26 ачаа тээврийн жолоочид шинжилгээ хийхэд коронавирус илрээгүй байна.

ОХУ-аас Алтанбулагийн боомтоор тавдугаар сарын 14-нд орж ирсэн 193 хүнд шинжилгээ хийхэд 37 хүнээс коронавирус илэрлээ. Батлагдсан тохиолдол 135 боллоо.

Өнөөдрийн байдлаар ХӨСҮТ-д 78 хүн эмчлэгдэж байгаа. 17 хүн нь хүндэвтэр, 39 хүн нь дунд зэрэг, 22 хүний биеийн байдал хөнгөн байна. Хоёр жирэмсэн эмэгтэй, нэг хорт хавдартай хүн эмчлэгдэж байгаа юм.

Шинжилгээ нь эерэг гарсан 37 хүнийг ХӨСҮТ-д авчрах ажлыг зохион байгуулж байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй