Д.Нямхүү: 109 хүнд шинжилгээ хийхэд коронавирус илрээгүй
2020-05-21 11:33

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Тавдугаар 20-нд ХӨСҮТ-ийн вирус судлалын хоёр лаборатори болон Дархан-Уул аймгийн салбар лабораторид нийт 109 хүнд шинжилгээ хийсэн байна. Бүгд сөрөг буюу коронавирус илрээгүй.

Задалж хэлбэл, ажиглах байранд тусгаарлагдсан зургаан хүний давтан шинжилгээ, Дорноговь аймгийн Ханги боомтод тусгаарлагдсан 57 ачаа тээврийн жолооч, тандалтын зорилгоор нийслэлийн дүүргийн эмнэлгүүдээс цуглуулсан 17 сорьцонд шинжилгээ хийхэд коронавирус илрээгүй байна.

Дархан-Уул аймгийн вирусологийн салбар лабораторид Алтанбулагийн боомтоор орж ирсэн 29 ачаа тээврийн жолоочийн шинжилгээнд мөн коронавирус илрээгүй.

Ингээд Монгол Улсад нийт 140 тохиолдол албан ёсоор бүртгэгдсэн. Үүнээс 26 хүн эмчлэгдэж дараагийн шатны хяналт руу шилжсэн байгаа. Одоо ХӨСҮТ-д 114 хүн эмчилгээнд байна.

Эмчилгээнээс гадна 67 хүн ХӨСҮТ-д ажиглалтад байгаагаас 47 нь тавдугаар сарын 24-нд гарна. Дараагийн хүмүүс удахгүй, ойрын өдрүүдэд гарч, ХӨСҮТ-д зөвхөн эмчилгээ хийлгэж байгаа хүмүүс үлдэнэ" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй