Зам тээврийн ослын улмаас өчигдөр хоёр хүүхэд амиа алджээ
2020-05-21 14:08

Өчигдөр зам тээврийн ослын улмаас нийслэлд нэг, орон нутагт зургаан хүний амь нас хохирчээ. Амиа алдагсдын дунд 6 настай, 13 настай хоёр хүүхэд байна.

Тавдугаар сарын 20-нд гарсан зам тээврийн ноцтой ослууд:

08:30 цагийн орчимд нийслэийн ХУД-ийн 3 дугаар хороо, “Бармаш” ХХК-ийн баруун замд Tоёота Аллиоn маркийн автомашин Tоёота Приүс маркийн автомашинтай мөргөлдөж, улмаар Tоёота Приүс нь зорчих хэсгийн гадна зогсож байсан явган зорчигч 46 настай, эрэгтэй, Э-г мөргөж амь насыг нь хохироожээ.

20:00 цагийн орчимд Завхан аймгийн Яруу сумын “Загастайн даваа” гэх газар /сумын төвөөс урагш 18км/ шороон замд Тоёота Раум маркийн Д жолоочтой автомашин онхолдож, зорчигч 72 настай, эмэгтэй, С, 13 настай, эрэгтэй, Б-гийн амь нас хохирсон.

20:15 цагийн орчимд Хэнтий аймгийн Цэнхэр мандал сумын 1-р баг “Цэнхэрийн голын гүүр” гэх газар /сумын төвөөс баруун урагш 12км/ асфальтан замд Ниссан Адван маркийн Ц жолоочтой автомашин онхолдож, зорчигч 56 настай, эмэгтэй Ц, 6 настай, эрэгтэй Ц, одоогоор нэр, хаяг нь тодорхойгүй 30-35 орчим насны эрэгтэй нарын гурван хүний амь нас хохирчээ.

20:30 цагийн орчимд Архангай аймгийн Их тамир сумын Бугат баг “Ахитын давааны ар” гэх газар /сумын төвөөс хойш 50км/ шороон замд, улсын дугааргүй бага оврын трактор онхолдож, жолооч 26 настай, эрэгтэй, О-гийн амь нас хохирсон байна.

Иймд замын хөдөлгөөнд оролцогч та бүхэн архи, согтууруулах ундааны төрлийн зүйл хэрэглэсэн үедээ тээврийн хэрэгсэл жолоодож хөдөлгөөнд оролцохгүй байх, орон нутгийн замд зорчихдоо тээврийн хэрэгслийн хурдыг тохируулж замын хөдөлгөөнд оролцохыг Тээврийн цагдаагийн албанаас анхаарууллаа.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй