Амралтын хоёр хоногт зам тээврийн ослын улмаас 4 хүн амиа алджээ
2020-05-25 12:34

Өнгөрсөн амралтын өдрүүдэд зам тээврийн ослын улмаас долоон хүн гэмтсэн бол нийслэлд нэг, орон нутагт гурван хүн амиа алджээ.

Ноцтой зам тээврийн ослоос дурдвал: 

2020 оны тавдугаар сарын 23-ны 06:00 цагийн орчим Өмнөговь аймгийн Ханхонгор сумын Өгөөмөр багийн нутаг дэвсгэрт асфальтан замд Тоёота Краун маркийн автомашин онхолдож, жолооч 34 настай, эрэгтэй Х-ын амь  нас хохирсон байна.

Тавдугаар сарын 23-ны 20:50 цагийн орчимд Чингэлтэй дүүргийн 17-р хороо, Чингэлтэйн замд Тоёота Приүс маркийн Н жолоочтой автомашин нь явган зорчигч  43 настай, эрэгтэй Г-г мөргөж, Хьюндэй Портер маркийн автомашин араас мөргөсөн байна. Явган зорчигч Г нь ГССҮТ-д хүргэгдээд нас баржээ.

Тавдугаар сарын 24-ний 16:50 цагийн орчимд Говь-Алтай аймаг, Баян-Уул сумын нутаг дэвсгэрт Haojue маркийн улсын дугааргүй мотоцикл, Тоёота Ист маркийн автомашинтай мөргөлдөж, мотоциклын жолооч 20 настай, эрэгтэй Г-гийн амь нас хохирчээ.

Тавдугаар сарын 24-ний 16:50 цагийн орчимд Дорнод аймгийн Цагаан-Овоо сумын 3-р багийн нутаг дэвсгэрт шороон замд Тоёота Спэсио маркийн Э жолоочтой автомашин замын хажуу уруу онхолдож, зорчигч 8 сартай, эрэгтэй Э-гийн амь насыг хохироосон хэргүүдийг тус тус шалгаж байна. 

Амралтын өдрүүдэд бүртгэгдсэн зам тээврийн осол, хэргийг өмнөх 7 хоногийн нөхцөл байдалтай харьцуулахад нийт дуудлага мэдээлэл 11,2 хувиар, бүртгэгдсэн зам тээврийн осол 9,9 хувиар, ослын улмаас нас барсан хүн 25 хувиар өсжээ.

Хяналт шалгалтын үеэр согтуугаар тээврийн хэрэгсэл жолоодсон 44 жолоочийг илрүүлж хуулийн дагуу хариуцлага тооцсон бол согтууруулах ундааны зүйл хэрэглэсэн үедээ автомашин жолоодож зам тээврийн осол гаргасан 5 зөрчил бүртгэгдсэнийг Тээврийн цагдаагийн албанаас мэдээллээ.

Иймд замын хөдөлгөөнд оролцогч та бүхэн тээврийн хэрэгслийн хурдыг тохируулан хөдөлгөөнд оролцох, архи, согтууруулах ундааны төрлийн зүйл хэрэглэсэн үедээ тээврийн хэрэгсэл жолоодож хөдөлгөөнд оролцохгүй байх, замын хөдөлгөөний дүрмээ чанд баримтлан, автомашиныхаа “ОЙРЫН ГЭРЛЭЭ” асааж Covid-19 халдвараас сэргийлэх уриалгад нэгдэж замын хөдөлгөөнд оролцохыг Тээврийн цагдаагийн албанаас анхаарууллаа.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй