Монгол Улс саарал жагсаалтаас гарах нөхцөлөө хангалаа
2020-05-29 11:59

Санхүүгийн хориг арга хэмжээ авах байгууллага болох FATF-ийн саарал жагсаалтаас гарах ажлын хэсэг хэвлэлийн бага хурал хийж байна. Ажлын хэсэг өнгөрсөн хугацаанд FATF хурал цахимаар ажлын тайлангаа амжилттай хамгаалсан аж.

Сангийн сайд Ч.Хүрэлбаатар "Өчигдөр FATF-ийн нарийн бичгийн дарга нарын газраас тайлангийн дүгнэлт ирсэн. Дүгнэлтийн хамгийн сүүлийн хуудсанд зургаан даалгавар бүгд хамгаалагдсан гэж бичсэн байна. Даалгавраа амжилттай биелүүлэхэд бүгд хамтран ажиллаж чадлаа. 

Тавдугаар сарын 4-ний өдөр үлдсэн үүрэг даалгаврыг 100 хувь хамгаалсан. Ингэснээр Монгол Улсын төр саарал жагсаалтаас гарах үүрэг даалгавраа FATF-ийн өмнө нэр төртэй биелүүллээ" гэв.

Монголбанкны Ерөнхийлөгч Б.Лхагвасүрэн "FATF-ийн  саарал жагсаалтад орж, зургаан үүрэг даалгаврыг 2019 оны аравдугаар сард авч, 2020 оны тавдугаар сар хүртэл долоон сарын хугацаанд нэг баг болж, даалгавраа амжилттай хамгааллаа. Монгол Улс FATF-ийн өмнө даалгавраа амжилттай биелүүлж, саарал жагсаалтаас гарах нөхцөлөө хангалаа" гэв. 

Тодруулахад, Монгол Улс 2019 оны аравдугаар сард FATF-ийн Саарал жагсаалтад ороход зургаан үүрэг даалгавар авснаас энэ оны нэгдүгээр сард БНХАУ-ын Бээжин хотод болсон хурлаар гурван ажлыг хамгаалж, хангалттай гэсэн үнэлгээ авч байсан юм. Харин тавдугаар сарын 11-нд FATF-д үлдсэн гурван ажлаа хамгаалсан юм. 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй