Ж.Амгалан: Гэрийн тусгаарлалтад байх хугацаандаа бааранд орох зөрчил гарч байна
2020-05-29 14:08

Улсын онцгой комиссын шуурхай штабаас өнөөдөр /2020.05.29/ мэдээлэл хийлээ.

Энэ үеэр Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан: "Цагдаагийн байгууллага энэ цар тахлын үед нийгмийн хэв журмыг сахиулах, олон нийтийн аюулгүй байдлыг хангах чиг үүргийнхээ дагуу хамгаалалт, аюулгүй байдлыг хангахад 4,800 гаруй алба хаагч ажиллаж байна. 

Та бүхэнд гурван зүйлийг анхааруулмаар байна.

Нэгдүгээрт, 21 хоногийн тусгаарлалтаас гараад 14 хоногийн гэрийн буюу өрхийн тусгаарлалтад байгаа иргэдийн хөдөлгөөн нилээд замбараагүй байна. Сүүлийн хоёр хоногт 28 иргэн урт болон богино хугацаагаар гэрийн тусгаарлалтаасаа гарч явсан, энд тэнд бааранд орсон, богино зайгаар гарч хүнтэй уулзсан зэрэг зөрчил дутагдлуудыг гаргаж байна. 

Гэрийн тусгаарлалтад байгаа иргэд тодорхой хэмжээний эрсдэлд байгаагаа өөрсдөө ухаарах хэрэгтэй. 

УИХ-ын сонгуулийн бэлтгэл ажил, цар тахлын ажил гээд олон ажил давхцсан тэр болгонд хүрч ажиллахад хүндрэлтэй байгаа энэ цаг үед цагдаагийн болон бусад мэргэжлийн байгууллагын хүн хүчний бололцоог хүндэтгэж үзмээр байна.

Дараагийн асуудал, гэрийн тусгаарлалтад шилжчихээд, албан ёсны тусгаарлах байранд байхдаа хаяг өгчихөөд тэр хаяг дээрээ байхгүй шилжээд явчихдаг, аймгаас хот руу, хотоос аймаг руу, дүүрэг хооронд шилждэг хөдөлгөөн маш их байна.

Өнөөдрийн байдлаар Улаанбаатарт 804, орон нутагт 95 иргэн өрхийн тусгаарлалтад бий.

Одоогоор өрхийн тусгаарлалтад байх хугацаандаа 524 иргэн ямар нэг байдлаар тусгаарлалтад байсан хаягаа сольсон, хөдөлгөсөн мэдээ байна. Энэ бол давхардсан тоо. Тиймээс цаашид гэрийн тусгаарлалтад байгаа иргэдийг тухайн хаягаас нь шилжүүлэхгүй байх талаар арга хэмжээ авахгүй бол болохгүй нь ээ.

Хариуцлага тооцно гэхээр өнөөдөр эдийн засгийн байдал ямар байгаа билээ, иргэдийн маань халаасанд юу байгаа билээ, тэр болгоныг торгоод шийтгээд байх хүндрэлтэй байна.

Гуравдугаарт, Цар тахлын аюулаас амны хаалт буюу маск хамгаалж байгаа дэлхий даяараа хүлээн зөвшөөрсөн. Амны хаалтаа хэрэглэдэггүй, гадуур маш их сэлгүүцэх явдал ялангуяа бага насны хүүхдүүдийн дунд их гарч байна. Иймд амны хаалтаа сайн зүүхэд ард түмэн анхаарч, таны амь нас, эрүүл мэндийг хамгаалахад онцгой чухал гэдгийг дахин санана уу" гэв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй