Зам тээврийн ослоор 9 хүн амь насаа алдсаны 3 нь хүүхэд
2020-05-30 13:56

Тээврийн цагдаагийн албаны жижүүрийн шуурхай удирдлагын хэлтэст тавдугаар сарын 25-29-ны өдрүүдэд нийт 967 дуудлага мэдээлэл бүртгэгдсэнээс 696 нь зам тээврийн ослын шинжтэй дуудлага мэдээлэл байсан аж.

Зам тээврийн ослоор есөн хүн амь насаа алдсаны гурав нь хүүхэд байжээ. Тэдний хоёр нь нийслэлд, долоо нь орон нутагт осолджээ. Мөн авто ослын улмаас 21 хүн бэртсэн байна. 

Зам тээврийн ноцтой ослууд:

Тавдугаар сарын 25-ны 10:30 цагийн үед Сэлэнгэ аймаг, Баянгол сумын гуравдугаар багийн нутаг дэвсгэр газарт шороон замд М жолоочтой Tоёота Приүс маркийн автомашин онхолдож, зорчигч 15 настай, эрэгтэй М амь насаа алджээ.

Тавдугаар сарын 25-ны 18:50 цагийн үед Дархан-уул аймгийн нутаг, Дархан сумын 13 дугаар  багийн нутаг дэвсгэр аймгийн төвд газарт шороон замд Дэү маркийн автомашин онхолдож, жолооч 45 настай, эрэгтэй М-ийн амь нас хохирсон байна.

Тавдугаар сарын 25-ны 22:43 цагийн үед СХД-ийн 32 дугаар хорооны нутаг, Эмээлтийн замд Хьюндэй Соната-6 маркийн Д жолоочтой автомашин явган зорчигч 45 настай, эрэгтэй Э-г мөргөж, амь насыг нь хохироожээ.

Тавдугаар сарын 26-ны 23:05 цагийн үед Дорноговь аймаг, Замын-Үүд сумын гуравдугаар багийн нутаг дэвсгэр асфальтан замд Ниссан Блюбёрд маркийн автомашины жолооч  А  нь  зогсоолд  байсан Даюүн маркийн ачааны автомашины араас мөргөж, Ниссан Блюбёрд маркийн жолооч 30 настай, эрэгтэй А нь амь насаа алджээ.

Тавдугаар сарын 27-ны 07:30 цагийн үед Баянгол дүүргийн 20 дугаар хорооны нутаг дэвсгэр ДЦС-4 салбарын төмөр зам дээр 31 настай, эрэгтэй Г нь галт тэргэнд мөргүүлж, амь насаа алджээ.

Тавдугаар сарын 27-ны 10:00 цагийн орчимд, Төв аймгийн Баянцогт сумын 2-р багийн нутаг дэвсгэр, шороон замд Хьюндэй Портер маркийн Э жолоочтой автомашин нь явган зорчигч 8 настай, эмэгтэй Н-ийн амь насыг хохироожээ.

Тавдугаар сарын 27-ны 13:50 цагийн үед Төв аймгийн Баянцагаан сумын 1-р багийн нутаг дэвсгэр, асфальтан замд Сканиа маркийн С жолоочтой ачааны автомашин, Tоёота Харриер маркийн автомашинтай мөргөлдөж, жолооч 37 настай, эмэгтэй Ч, зорчигч 1 настай, эмэгтэй Н-гийн 2 хүний амь нас хохирсон,

Тавдугаар сарын 27-ны 20:00 цагийн үед Төв аймгийн Бүрэн сумын гуравдугаар багийн нутаг дэвсгэр, шороон замд Tоёота Приүс маркийн автомашин онхолдож, жолооч 41 настай, эмэгтэй Д-гийн амь нас хохирсон хэргүүдийг тус тус шалгаж байна.

Тээврийн цагдаагийн албаны мэдээлснээр, хүний амь нас хохирсон осол өмнөх долоо хоногоос 11,2 хувиар өссөн байна. Харин нийт дуудлага мэдээлэл 7,6 хувиар, бүртгэгдсэн зам тээврийн осол 1,2 хувиар тус тус буурчээ.

Мөн цагдаагийн алба хаагчдын хяналт шалгалтын үеэр согтуугаар тээврийн хэрэгсэл жолоодсон 104 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 13 хүнийг шүүхээр баривчилж хуулийн дагуу хариуцлага тооцсон байна.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй