3 жил хоригдсон тагнуулч тагтааг суллажээ
2020-06-02 09:47

Энэтхэгийн хууль сахиулагчид Пакистаны тусгай албанд ажилладаг хэмээн сэжиглэн гурван жил гаруйн хугацаанд хорьж байсан тагтаа шувууг сулласан байна.

2016 онд хөлийн сарвуунд нь олон оронтой тоо бичсэн “шошго”-той шувууг цагдаа нар барьжээ. Тоог хөрш Пакистан Улсын нууц албаныханд зориулсан нууц код хэмээн тусгай албаныхан сэжиглэсэн байна.

Гэвч Пакистаны тал огт өөр шалтаг тоочин тагтааг авахыг оролдож байсан гэнэ. Шувууг өөрийнхөө гаршуулсан тагтаа хэмээн пакистаны нэгэн загасчин эр тайлбарласан байна. Сарвуун дахь тоо нь түүний гар утасны дугаар гэжээ. Харин шувууны уралдаанд оролцож байсан тагтаа яахаараа Энэтхэгийн нутаг дэвсгэрт “дүүлэн нисч” явсан тухайд ямар ч тайлбарыг өгч чадаагүй гэнэ дээ, загасчин этгээд...

“Зүгээр л гэм зэмгүй шувуу шүү дээ...” гэх загасчны үгэнд итгээгүй энэтхэгийн цагдаагийнхан шувууг гурван жилийн турш хорьж, мөрдөн шалгах ажиллагаа явуулсан байна.

Харамсалтай нь, тагнуулын ажиллагаа явуулсан гэдгийг нотолж чадаагүй учраас тавдугаар сарын 28-нд тагтааг суллан тавьжээ. Харин суллагдсан “хурмастын тагнуулч” хаашаа ниссэн гэдэг нь тодорхойгүй байгаа аж.
 

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй