А.Амбасэлмаа: 212 шинжилгээний хариу бүгд сөрөг
2020-06-02 12:02

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн Тандалт судалгааны албаны дарга А.Амбасэлмаа "Зургаадугаар сарын 1-ны өдөр ХӨСҮТ-ийн вирус судлалын хоёр лаборатори болон Дархан-Уул аймгийн вирусологийн салбар лабораторид нийтдээ 212 хүний шинжилгээ орсон байна. Коронавирус илрээгүй, бүгд сөрөг гарсан.

Үүнд, тандалтын зорилгоор Завхан аймгийн нэгдсэн эмнэлэг болон өрхийн эрүүл мэндийн төвүүдээс цуглуулсан гурван сорьц, ХӨСҮТ-д тусгаарлагдсан найман хүн, ажиглах байранд тусгаарлагдсан нэг хүний давтан шинжилгээ орсон байна.

Мөн Стамбул-Улаанбаатарын тусгай үүргийн нислэгээр ирсэн зорчигчдын давтан шинжилгээ хийгдсэн.

Бид ажиглах байранд байгаа хүмүүсийн шинжилгээг ДЭМБ-ын зөвлөмжийн дагуу ирмэгц нь авсны дараа дахин 7, 14, 21 хоногт нь авч байгаа. Бас гэртээ тусгаарлагдах 14 хоногийн хугацаанд нь хоёр удаа шинжилгээг давтан авч байгаа.

Сэлэнгэ аймгийн Алтанбулагийн боомтоор орж ирсэн 10 ачаа тээврийн жолоочийн шинжилгээнд коронавирус илрээгүй байна.

Нийт коронавируст халдварын зөөвөрлөгдөн орж ирж батлагдсан 185 тохиолдол байгаа. ХӨСҮТ-д 141 нь эмчлэгдэж байна. Эмчлэгдэж байгаа хүмүүсийн ор хоног нилээд урт байна. 14-53 хоног байна. Дундаж ор хоног 30. Насны хувьд 5-65 насны хүмүүс. Дундаж нас 24,2. Хүйсийн хувьд ихэвчлэн эрэгтэй хүмүүс буюу 65 хувь нь эрэгтэйчүүд. Батлан хамгаалахын чиглэлээр ОХУ-д сурч байсан сонсогчдын дунд өвчлөл нилээд гарсан учраас эр хүйс манай орны хувьд нилээд давамгайлж байна.

Илэрч буй эмнэлзүйн гол шинж тэмдгүүд нь хоолой өвдөх, ханиалгах, толгой өвдөх, хамар битүүрэх, халуурах, булчин өвдөх, дотор муухайрах, амьсгал давчдах, ядрах сульдах гэсэн иймэрхүү шинж тэмдэгтэй байна.

ХӨСҮТ-ээс эдгэрч гарсан хүмүүс Энх-Саран сувилалд 14 хоног тусгаарлагддаг. Энэ хугацаандаа бас шинжилгээ хийлгэдэг. 

Одоогийн байдлаар эдгэрч гарсан 44 хүнээс сувилалд 16 хүн байна. Гэрийн ажиглалтад 15 хүн, ажиглалтаас гарсан 13 хүн байна. Сувилалд байхад нь хоёр удаа шинжилгээ авна, сувиллаас гараад гэрийн ажиглалтад байхад нь бас шинжилгээ авна. Тэгээд тусгаарлалтаас гаргаж байгаа" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй