А.Амбасэлмаа: Өчигдөр 374 хүний шинжилгээ орсноос коронавирус илрээгүй
2020-06-03 11:38

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн Тандалт судалгааны албаны дарга А.Амбасэлмаа "Зургаадугаар сарын 2-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори болон Дархан-Уул аймгийн вирусологийн салбар лабораторид нийтдээ 374 хүний шинжилгээ орсон байна. Шинжилгээнд коронавирус илрээгүй, бүгд сөрөг гарсан.

Энэ шинжилгээнд, тандалтын зорилгоор Улсын 3-р төв эмнэлэг, Улсын 2-р төв эмнэлэг болон Сонгинохайрхан дүүргийн нэгдсэн эмнэлгээс цуглуулсан найман сорьц, ажиглах байранд тусгаарлагдсан найман хүний болон Зэвсэгт хүчний үүргийн онгоцоор ирсэн 120 зорчигчийн давтан шинжилгээнүүд орсон байна.

Мөн Алтанбулагийн боомтоор орж ирэн Төв аймгийн Ахмадын сувилал, Баянбуурал, Баянхангай сувилал болон Орхон, Дархан-Уул аймагт тусгаарлагдаж буй 209 хүний давтан шинжилгээ мөн орсон байна.

Сэлэнгэ аймгийн Алтанбулагийн боомтоор орж ирсэн 29 ачаа тээврийн жолоочид шинжилгээ хийсэн. Бүгд сөрөг гарсан. коронавирус илрээгүй.

Өнөөдөр ХӨСҮТ-д 178 хүн байна. Эмчилгээнд байгаа 141 өвчтөн, бусад нь ажиглалтад байгаа хүмүүс. Нийт 185 батлагдсан тохиолдлоос 44 нь эмчлэгдэж эдгэрээд сувилал, гэртээ гарсан байгаа. 44 хүний 16 нь сувилалд, 15 нь гэрт, 13 хүний ажиглалтын хугацаа дууссан.

Эмнэлэгт байгаа хүмүүсийн биеийн байдал тогтвортой, сайжирч байна. 118 хүн нь хөнгөн, 23 хүн нь хүндэвтэр байна" гэв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй