Архи хулгайлах гэж хонгил ухжээ
2020-06-04 10:07

“Спиртын дутагдалд орсон” хулгайчид коронавирусийн халдварт цар тахлын улмаас хаагдаад хэдэн сарын нүүрийг үзэж буй архи, дарсны дэлгүүрээс “галт” ундааг хулгайлахын тулд хонгил ухсан хэрэг ӨАБНУ-ын Йоханнесбург хотноо гарчээ.

Согтууруулах ундаа худалдахыг хориглосон хоёр сарын хориог цуцлахын өмнөхөн дэлгүүрийн ажилтнууд нээлтэндээ бэлтгэх гэж ирэхдээ дэлгүүрт нь хулгай орсныг мэдсэн байна.

Хэрэгтнүүд газар доогуурх цахилгааны шугам сүлжээний болон ус зайлуулах сувгаар дамжин онилсон газартаа ойртон хэсэг зайнд газар ухан хонгил гаргаж, дэлгүүрийн шалыг цөмлөн орсон байжээ.

Хяналтын камерын бичлэгийг үзэхэд, архины донтой урт гартнууд анх тавдугаар сарын 21-нд буюу хориог цуцлахаас 10 хоногийн өмнө дэлгүүрт  орсон байна. Яг хэргийн газарт гурван этгээд “ажилласан” байх агаад шалан дор хам хэрэгтнүүд нь байсан бололтой. Хэрэгтнүүд хэд хэдэн удаа эргэн ирж хулгайн хэрэг үйлдэхдээ нийтдээ 300 мянган рэнд (49 сая 200 мянган төгрөг)-ийн архи, виски, брэнди, шар айраг авч явсан байна.

ӨАБНУ-ын засаг захиргаа гуравдугаар сарын 27-нд хатуу хөл хориог тогтоосон юм. Иргэддээ эмчид үзүүлэх, дэлгүүр орох зорилгоор л гэрээсээ гарахын зөвшөөрсөн билээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй