Д.Нямхүү: 21 хүн эдгэрч, дараагийн шатны хяналт руу шилжлээ
2020-06-04 11:38

Эрүүл мэндийн яамнаас шинэ коронавирус COVID-19-ийн халдварын талаар өнөөдөр ээлжит мэдээллээ хийлээ.

ХӨСҮТ-ийн ерөнхий захирал Д.Нямхүү "Зургаадугаар сарын 3-нд ХӨСҮТ-ийн вирус судлалын хоёр лаборатори болон Дархан-Уул аймгийн салбар лабораториудад нийтдээ 469 хүнд шинжилгээ хийснээс 468 хүний шинжилгээнд коронавирус илрээгүй. Харин нэг хүний шинжилгээнд коронавирус илэрлээ. Тавдугаар сарын 26-нд Москва-Улаанбаатарын тусгай үүргийн нислэгээр ирсэн хүний давтан шинжилгээнд коронавирус илэрсэн.

Тандалтын зорилгоор УНТЭ, Орхон аймгийн нэгдсэн эмнэлэг, Сонгинохайрхан, Хан-Уул, Баянгол дүүргийн нэгдсэн эмнэлгүүдээс цуглуулсан 13 сорьцонд шинжилгээ хийхэд коронавирус илрээгүй байна.

Мөн Орхон, Сэлэнгэ, Дархан-Уул аймагт тусгаарлагдсан 235 хүний давтан шинжилгээг хийхэд коронавирус илрээгүй.

Дархан-Уул аймгийн вирусологийн салбар лабораторид Алтанбулагийн боомтоор орж ирсэн 45 ачаа тээврийн жолоочид шинжилгээг хийсэн. Мөн коронавирус илрээгүй байна.

Өнөөдөр сайн мэдээтэй. ХӨСҮТ-ийн эмчилгээний хэсгээс 21 хүн эдгэрч, дараагийн шатны хяналт руу шилжлээ. Үүнээс, цэргийн сургуулийн дөрвөн сонсогч, бусад нь Москва хотын их, дээд сургуулиудын оюутан гээд есөн оюутан эдгэрч гарлаа.

Өнөөдрийн байдлаар ХӨСҮТ-д 157 хүн байна. Эмнэлгээс нийтдээ 65 хүн эдгэрч гараад байна. Үүнээс 36 хүн нь сувилалд, гэрийн ажиглалтад 16 хүн, бүрэн эдгэрч ажиглалтаас гарсан 13 хүн байна.

Тавдугаар сарын 13, 14-нд ирсэн зорчигчдоос голлон эдгэрч гарлаа. Эмчилгээний хугацааг тооцвол, 21-22 хоног эмчлэгдэн гарсан байна" гэлээ.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй