Тайландад гацсан иргэдээ татаж авахыг хүсэв
2020-06-04 13:34

Тайландын Вант Улсад хүнд нөхцөлд байгаа монголчуудын ар гэрийнхэн Онцгой байдлын ерөнхий газрын гадна өнөөдөр жагсаал хийлээ. 

"Тайландад 160 гаруй Монголчууд байна. Зарим нь өөр орноос транзит нислэгээр зорчих явцад хил хааснаас байх газаргүй, ажил төрөлгүй байна. Дөрвөн бага насны хүүхэдтэй гэр бүл, эмчилгээгээр явсан, өндөр настан, эрүүл мэндийн шалтгаантай олон хүн гацчихаад байна. Тайланд улс коронвирусийн халдвар бага гарсан орнуудын нэг. Тиймээс тус улс руу шууд нислэг гаргаж өгөхийг хүсэж байна. Учир нь Зүүн Азийн орнуудад байгаа иргэдээ авахын тулд Сөүл-Токиогийн транзит нислэгээр авна гэж мэдээлсэн.

Гэтэл зөвхөн Японд 1460 гаруй хүн ирэх хүсэлтээ өгөөд байна. Мөн Солонгосоос 2000,3000 хүн хүсэлтээ ирүүлсэн. Энэ олон иргэдийг хоёр гурван удаагийн нислэгээр авах боломжгүй шүү дээ. Тайланд зэрэг Зүүн Азийн орнуудад байгаа хүмүүс жагсаалтын бүр сүүлд орж байна. Буцаж ирэх ямар ч боломж алга. Энд байгаа олон хүмүүс өнгөрсөн хоёрдугаар сараас хойш буюу дөрвөн сарын хугацаанд албан бичиг хүргүүлж тэвчээртэй хүлээсэн. Гэтэл нэг ч нислэг илгээгээгүй тул бид аргагүй цуглахад хүрч байна" гэж иргэдийн төлөөлөл ярилаа.

Тайландын Вант Улс дахь Элчин сайдын яамны зүгээс нутаг буцах хүсэлт гаргасан иргэдийг бүртгэхээс гадна хүнд нөхцөл байдалд орсон иргэддээ туслах ажлыг хийж байгаа хэдий ч иргэдийг татан авах эсэх шийдвэрийг УОК шийдвэрлэж байгаа учир өнөөдөр жагсаал зохион байгуулж байгаагаа иргэд хэлж байв.

Эх сурвалж www.wikimon.mn
Манай сайт танд таалагдаж байвал LIKE хийгээрэй. Танд баярлалаа.
  • Их уншсан
  • Их сэтгэгдэлтэй